Mizo Cultural Organisation (MCO) buatsaihin vawiin nileng khan Zarkawt Recreation Centre ah Cultural Day hman a ni a, Art & Culture Minister Pu R.Lalzirliana chuan khuallian niin he hun hi a hmanpui a ni.

Khuallian hian Cultural Day hmang tura kalkhawmte hmaah thu sawiin Mizo hnahthlak te hi hnam peng hrang hrang kan thahnem hle a, ramri inthen danin a zirloh avangin hmun hran hranah kan awmdarh a, India ram mai bakah ram pawn hmun hrang hrangah kan awm a kan tawng hman te pawh a dang hret hret a, hemi chung hian kan pi leh pu te atanga unau leh hnam khat kan nihna hi kan hriatreng fo a tul ani a ti a, 'MIZO' tih ah hian Chhinlung chhuak te chu kan inchhunglut vek a, tumah neitu bik awm lovin a kungpui bik kan awm chuang lova, kan zavai hian Mizo kan ni tih hi pawm tlan thiam a pawimawhin tawng hrang hmang te pawhin kan in pawm tlan tawn a tul a ni a ti bawk. Lal leh Khawnbawl Upa ten khawtlang an lo enkawl tawh dan kha zirtur tam tak a awm a, Val Upa te zah tur leh an thu leh hla ngaichang tura an lo inzirtir te phei chu kan tunlai huna kan mamawh em em, chhawm nun zel atana pawimawh leh hlu tak a ni a ti.

Minister chuan Mizo hnam ziarang hrang hrang kan pi leh pu ten min lo hnutchhiah te hi ngaihhlut leh ngaihsan thar leh kan mamawh a, Pathian min dah na, he Mizo hnam hi engtikahmah kan thlak thei dawnlo a, kan nihna (identity) kengtu anih miau avangin ngaihhlut hi kan tihmakmawh ani a ti a, Tlawmngaihna hi taimakna leh tumruhna nen kan kal kawp tir a ngai a ni a ti bawk.

Mizo Cultural Organisation hi kum 1993 February ni 13 ah Aizawl khawpui chhunga Cultural Club pasarih kalkhawmin an din a, Art & Culture Department chu Nodal Department ah neiin tun dinhmunah hian Aizawl khawpui chhungah branch 68 an nei a, Sub-Headquarters pali - Kolasib, Champhai, Serchhip leh Mamit an nei a, hei bakah hian Group Headquarters pahnih Khawhai ah leh Chhawrtuiah an nei bawk. Sub-Headquarters leh Group Heqdquarters zawm remchang lo thingtlang khaw engemawzatin direct in General Headquarters an zawm bawk a ni.

Mizo Cultural Organisation hian a tum ber chu Mizo hnam ziarang humhalh te, Mizo hnam zai leh lam te humhalh a tihhmasawn te, thangthar lo awm zel te hnena zirtir chhawn te hnam inpumkhatna vawn nun te a ni a. Mizo hnam ziarang chi hrang hrang te lam leh zai hmangin an phochhuak thin a, Tourism Department nen pawh thawkhovin India ram hmun hrang hrangah Cultural Troupe an tirchhuak thin a ni.

Vawiin Cultural Day ah hian MCO club hrang hrang te leh Cultural Troupe ten hnam lam chi hrang hrang entirin, zaithiam ten mizo hla chi hrang hrang an sa a, Pu James Lalchhuanawma, President, MCO  General Headquarters leh Pu Lalbiakhlua, General Secretary, MCO General Headquarters ten thu an sawi a ni.