Vawiin kha Mizoram in India Danpui hnuaia State anga a inrelbawlna ni champha vawi 32-na a ni a. He ni pual hian Vanapa Hall-ah Lawmna Inkhawm chu Mizoram Governor Kummanam Rajasekharan uapna hnuaiah Chief Minister Pu Zoramthanga hovin chawhma khan hman a ni.

State Day Lawmna thuchah sawitu, Mizoram Governor Kummanam Rajasekharan chuan Mizoram in State puitling a nihna Ni a lawm thei chu thil ropui tak a ni a ti. Mizoram in state a nih theihna tura an theihna zawng zawng leh nunna hlutak lo hlantute zawng zawng zah leh chawimawi chu khua leh tuite mawhphurhna a nih thu a sawi a. Kum 20 hun harsa chu kum 30 chhunga remna leh muana hnuaia hmasawnna ten a thawi dam thawkhat tawh a ni a ti.

State puitling a nih angin achhunga mipuite pawh India Danpui hnuaia khua leh tui te mawhphurhna te tha taka zawmin hmasawnna lamtluang kan zawh a ngai a ni a ti. Remna leh muanna hnuaiah Mizoram sawrkar chuan hmasawnna ngelghet siam chho mekin Socio-Economic Development Policy leh hmachhawp pawimawh tak tak kaltlangin tan a la chho dawn a. Hengah te hian hlawhtling tur chuan mipuiten sawrkar an thlawp tlat a ngai a ni a ti. Governor chuan Mizoramin thahrui a ngahna lai deuh  - Agriculture, Horticulture, Food Processing, Organic Farming, Handloom & Handicrafts leh thildangah te mipui ten  sawrkar hmalakna an tuipui leh zual a pawimawh hle dawn tih a sawi a. "Infiamna huangah te, kawngpui tha siam kawngah leh kan mamawh zual neih kawngah te tan la chhunzawmin  Mizoram hi State dangte entawn, Model State ah kan siam dawn a ni", a ti.

Chief Minister Pu Zoramthanga pawhin State Day puala thuchah sawiin Mizoram State lo pianchhuahna chu Remmna rah a ni a ti. Peace Accord hlawhtling ber zinga mi kan neih theihna kawngah Mizo mipui zawng zawngte, Kohhranmite, Zirlaite, sawrkar hnathawkte leh Mizo National Front( MNF) te thawh hlawk dan a inang tlang vek a. Chuvangin Mizoram State  Day hi chhunga chengte tan mai bakah hmun hrang hrang cheng Mizo mipui zawng zawng te tan a hlu em em a ni a ti. India ram tana Republic Day leh Independence Day a hlut ang tluk zetin Mizo te tan Mizoram Day hi a hlu a; nakumah phei chuan Organising Committee changtlung  zawk ruahmanna hnuaiah ropui taka lawm turin  rel  a ni dawn a ni a ti.

State awmzia sawifiahin midangte state neih aiin Mizoramin State a neih dan chu a changtlung zawk a, a nghet zawk bawk a ni  tih a sawi a. Chief Minister chuan Mizoram state chhunga chengte chuan state dangte neih ang an neih vek piah lamah humhimtu ILP, Inremna Thuthlung( Peace Accord) leh India Danpui chhunga mi - India Danpui lak atang thleng pawha invenna; Mizoram tan bika Special Provision chuanna Arcticle 371 G) kan nei leh zel a ni a ti. Mizoram leilung chhung leh a chunglangah hauhsakna haihchhuak tur tam tak a awm tih a sawi a. Heng te hi enge ni tih hriata, rinawmna leh taihmakna nen  rilru put hmang thlaka haichhuah chu achhunga chengte mawhphurhna leh chanvo a ni a ti.

State Day Celebration programme hi Chief Secretary Pu Lalnunmawia Chuaungo chuan  Chairman niin a kaihruai a. Upa Lalnilawma, Joint Secretary, Mizoram Kohhran Hruaitu Committee(MKHC)  chuan hunserh a hmanga. He hunah hian fuihna thuchah tawi NGO Co- Coordination Committee Chairman Pu Vanlalruata, CYMA President hnen atangin ngaihthlak a ni a. Rev  R. Lalrinsanga hnen atangin fuihna thu ngaihthlak a ni bawk a ni.

Vawiina State Day Lawmna Inkhawmah hian Minister, MLA te leh Sawrkar hnathawk lian te an kal kim thawkhat hle a. Vantlang mipui lam atanga chhimtu pawh thahnem tak an awm a ni. Kum 1987 February 20 khan Mizoram chu Union Territory atangin dinhmun sang zawkah India ram State 23-na ni tura hlankai a ni a. Atirah District 3 a then niin tun dinhmuh District 8 a awm a ni. Mizoram state zau zawng hi Square Km 21,087 niin kum 2011 Chhiarpui a tarlan dan chuan Mizoram State mipui tam zawng chu 1,091,014 a ni a. Mizoram mipui zinga 91.58% ten ziak leh chhiar an thiam a ni.