Vawiin hian Chhingchhip Area Mizoram Upa Pawl te chuan Government Chhingchhip Middle School -1 ah Area Conference an hmang a. Bialtu MLA leh Deputy Speaker, Mizoram Er. Lalrinawma chuan khuallian niin a hmanpui.
He hunah hian khuallian chuan, Tuikum bial mipuiten a tum hnihna atana an bialtu MLA a min thlan tlin leh avangin ka lawm em em a. He rawngbawlna hna hi theihtawpa ka thawh theih nan in mi tawngtaipuina ka dil tak zet che u ani, tiin lawmthu a sawi a. Mipui thlawpna lovin eng sawrkar mahin a Policy leh Programme te a tihlawhtling ngai lova chuvang chuan in mi thlawpna kan mamawh hle ani, tiin a sawm bawk a ni.
Er. Lalrinawma chuan MUP member ni pha tur chuan kum tam tak Pathian malsawmna dawn hmasak phawt a ngai a, MUP member nih hi malsawmna chhinchhiahna chikhat ani chuvang chuan vawiina MUP member te hian in vanneihna leh malsawmna te rilruah vawng reng turin ka chah che u ani, a ti bawk. Mizo te hian tun hma ata 'upa thu' kan nun kawng veng tlat thintu kan nei thin a, hei ringawt pawh hian upate pawimawhzia a tilang fiah hle a. Chutihlaiin 'tar at' nei anga kan piputen thu an lo sawi thin chhan kha kan kum upat chhoh deuh hnuah ngaihtuahna kan hman peih loh thin vang anih a rin thu sawiin, kum upa, fing leh rawn tlak an tam em em ani, a ti a. Lehkha chhiarte, taksa enkawl uluk leh thianghlimna lam ngai pawimawh ila thangthar zel te tan mi tangkai tak kan ni zel dawn ani, a ti ani. Tin, khuallian hian kan tawng te, kan hnamze hrang hrang te venhim kawngah tanlak a tul thusawiin, kan hnam dintu leh tawng hran min petu Pathian min din anga he hnam hi a lo dinchhuah theih nan kan tawng leh culture te i ngaihlu deuh deuh ang u, tiin MUP member te a chah bawk ani.
He Conference hi an Area Vice President Pu VH Khuma chuan a kaihruaia, Rev J. Lalbiaknia'n hunserh hmangin Pu Patrick Zathuama'n palaite lawmna thu sawiin ani hian khuallian Er. Lalrinawma hnenah hian lawmpuina Citation a hlan nghal ani. Tin, MUP Branch tin ten Report an pek bakah an Conference 2017 leh 2019 Conference inkara an member boralte sunna hun an hmang a ni. Chhingchhip Area ah hian MUP Branch pasarih (7) an awm a, an zinga Branch pahnih Hmuntha leh Khawbel atanga report a luh loh avangin an member hi Report lut chinah mi 579 an awm mek a, kum 2017 -19 inkara an member boral zat report chin chu 36 ani.
Hengte bakah hian Branch intihsiakna te, intihhlimna te neiin, Jt YMA Chhingchhip kaihhruaina hnuaiah Area hruaitu thar thlanna an nei a, tlai lamah chawhlui an kilho nghal ani.
