Nizan khan Vanapa Hall-ah Indian Council for Cultural Relations (ICCR), Art Novelty Gallery, Aizawl leh Art and Culture Department tangkawp buatsaih 'Cultural Mosiac : An International Art Exhibition' kharna hun hman a ni a, he hunah hian Art & Culture Minister Pu R. Lalzirliana chu Khuallian a ni.

Khuallian chuan Mizoram chhung mai ni lovin India ram pawn atangin lemziak thiam ten an kutchhuak an pholang hi a lawmawm hle a ni, a ti a. Exhibition hi Mizoram tan art lama hmasawnna lungphum pawimawh tak a ni, tiin hmun hrang hranga artist-te inkarah inthianthatna  a thlen a, ngaihtuahna leh suangtuahna inhrilhtawnna hun tha a ni, a ti a. Mizo hnam ziarang leh nunphung te, hnam incheina te leh lam te thlengin ram pawnin an hmelhriat theih nan Indian Council for Cultural Relations (ICCR) nena thawh hona a awm zel a beisei thu a sawi a. Mizo artist-te hnenah chuan ramdang pawhin kan kutchhuakte an hmelhriat ngei theih nan ngaihtuahna zau zawk nen hmalam kan pan a ngai a ni, a ti.

Exhibition-ah hian lemziak thiam 19 in an kutchhuak 43 mipui en theihin an pholang a. India ram pawn atangin mi 3 leh ramchhung (Mizoram pawn) atangin mi 3 an tel bawk a ni. ICCR bultuma international exhibition Mizorama buatsaih a nih vawikhatna a ni.  

ICCR, Shillong Regional Director Pu N. Munish Singh chuan kalkhawmte lawmna thu a sawi a. Art Novelty Gallery Curator Pi Lalhming Mawii chuan exhibition chungchangah report a pe a. Artist-te aiawhin Pu Manish Pushkale (Bhopal) chuan thusawina hun a nei a. Pi C. Luri atangin thusawi ngaihthlak niin kharna programme hi ‘Hlim Zan: A Soulful Night of Music’ in a chhunzawm a, zaithiam tak takin hun an hmang a ni.