Nimin chawhma dar 10:00 khan Champhai District Child Protection Unit leh UPC NEI Khawzawl Pastor Bial Sunday School Department tangkawp bultumin Khawzawl Vengthar UPC NEI Kohhran Sunday School Hall-ah Khawzawl khawpui chhunga UPC Kohhran hrang hranga naupang Sunday School zirlaite leh zirtirtute tan Awareness Campaign buatsaih a ni a. He hunah hian Danin naupangte a humhalh dante inzirtirna leh naupangte hnena an hriat tur pawimawh hrang hrang inhrilhhriatna hun neih a ni a. Champhai District Child Protection Unit atangin District Child Protection Officer Pi R. Lalrinchhani leh Pi Lalsiammawii, Legal cum Prohibition Officer ten zirtirna an pein JJ Act, 2015 leh POCSO Act, 2012 chungchang leh heng Dan hnuaia naupangte humhalh dan leh naupangte dikna leh chanvo te an sawi a.
Zirtirna petute chuan Naupang enkawltute hnenah vawiina naupangte kan enkawl dan hian naktuk a hril tih hria a, naupangte uluk taka enkawl turin an chah a. Case an lo khawih tawhah naupang tak takin hauh an hlauh avangin an chunga thil thleng te an nu leh pate an hrilh ngam lo thin tih sawiin fate tana an thlamuanna ni turin leh a chhe berah pawh faten an chunga thil thleng an hrilh ngamna turin fate chu kawm ngeih a, vo leh hau zawng ringawt a fate thunun lo turin kalkhawmte an chah a ni.
Nimin a Awareness Campaign neihah hian Khawzawl khawchhunga UPC NEI Kohhran hrang hrang atangin Sunday School naupang 50 vel leh zirtirtu 15 vel an tel thei a. UPC (NEI) Khawzawl Pastor Bial Sunday School Department hian kumdangah pawh Sunday School naupangte leh zirtirtute tan hetiang Awareness Campaign hi an lo buatsaih tawh thin a ni.
