District Hospital Lawngtlai chuan fai, thianghlim leh inrelbawl ṭhat kawnga damdawi in hrang hrang inelna "Kayakalp 2018"-a Mizorama pakhatna an nih leh damdawi in mawi ber lawmman "most beautiful award" an lak chu vawiin khan hospital tual zawlah an lawm a. Lawngtlai East bialtu Member of Legislative Assembly (MLA) Pu H. Biakzaua chuan khuallian niin a hmanpui.

Pu H. Biakzaua chuan District Hospital Lawngtlaiin Kayakalp 2018 Mizorama lawmman pakhatna leh most beautiful award an la chu lawmpuina hlanin, thawktute leh thawhpuitute inpekna leh ṭhahnem ngaihna chu fakawm a tih thu a sawi a. Damdawi inte fai leh thianghlim taka enkawl a nih chuan natna inkai chhawn theihte tla hniamin, damlote tan pawh hmuh nuam leh hahdamthlak tak a lo ni ang a, an dam hma phah thei dawn a ni tih hriain sawrkarin Kayakalp inelna a buatsaih tih a sawi. Damdawi in thli leh bawlhhlawh dang a nih dan tur taka sawngbawl a nih chuan rimchhia leh natna hrik awm theihna tam tak bovin, thawktute leh pantute tan hriselna lamah a sawt hle dawn tih a sawi a. Faina chu intihsiak hun chhung atan chauh ni lovin chhunzawm zel tur a ni tiin, sawrkar damdawi in chu mahni ta a nih hria a, a enkawl leh vawn thianghlim kawnga ṭawiawm zel turin mipuite a sawm nghal.

Khual zahawm, inel laia District Medical Superintendent (DMS), tuna voluntary pension-a chhuak ta Dr Lalmalsawmi Hmar chuan lawmman dawnte lawmna chhang a zai a. District Hospital Lawngtlaiin chuti ang lawmman a dawng thei chu Pathian malsawmna leh thawktute leh District mipui zawng zawng thawh hona zar a ni tiin, faina kawnga mite tihhmuhtu leh entawn tur ni thei se a duh thu a sawi.

He hunah hian Ward Superintendent Pi Lalremruati Colney chuan hunserh hmangin, i/c DMS Dr Zothanpari Chhakchhuak chuan inlawmna thu sawiin report a pe a. Lai Autonomous District Council (LADC) Chairman Pu V. Zirsanga bakah, Central Young Lai Association (CYLA), Lai Women Association (LWA), Mizo Hmeichhe Insuihkhawm Pawl (MHIP), Chief Medical Officer leh mi dang hnen aṭangin lawmpuina leh duhsakna thu tawi ngaihthlak a ni a. Damdawi ina thawk doctor leh staff hrang hrang leh Auxiliary Nurse Midwifery (ANM) zirlaite aṭangin chanvo hrang hrang - zai, lam leh lemchan te ngaihthlak a, thlir ho a ni a. Medical Officer Dr Paul Lalchungnunga'n lawm thu sawiin, lawmman lawmna ruai kil ho nghal a ni.

District Hospital Lawngtlai hian Kayakalp 2017-ah khan Mizoram pumah lawmman pahnihna leh most improved award an lo dawng tawh a. Damdawi in fai, thianghlim leh pan nuam ni tur hian ṭan la chho rengin, LADC, sawrkar line department, tlawmngai pawl leh mipuite ṭawiawmna nen tun dinhmun hi an thleng thei a. Hnungtawlh lova hma sawn zel zawk an la tum tih an sawi bawk.