Vawiin chawhma khan Hualngohmun leh Melriat inramrina bulah  Montfort Bothers leh Ursuline Francescan Sisters te enkawl, Monfort Academy leh Monfort School Building thar chu hawn a ni a. He school building thar hi Most Rev. Stephen Rotluanga, Bishop of Aizawl chuan Pathian hnenah a hlan hmasa a, hemi hnu hian khuallian I& PR Minister Pu Lalruakima chuan zirna in tha tak ni tura duhsakna nen a hawng a ni.

Montfort Academy building thar hawngtu, I&PR Minister Pu Lalruatkima chuan Zirtirna chu ram leh hnam hmasawnna lungphum a nih avangin ngaihpawimawh loh a thiang lo a ni a ti. Mihring tungchhova kal zawng zawngte tan hian piantirh atanga thihni a thlen hma chu inzir reng a ngai tih sawiin, "Mizoten karkhat chhunga ni hrang hrang hming te kan phuah zingah Zirtawpni a awm tih mai lo chu Mihringte tan  in-Zirtirtawpni a awm ve lo a ni. Hman deuh kha chuan nu leh paten an fate kha lehkha an zir that loh chuan hnathawka eizawngah an sawi thaih thina; tunah chuan engkimah technology a tel vek tawh avangin lehkha zir leh thiam lo tan chuan hna thawh tura bar a awm tawh lo a ni",  a ti a. Mizoram sawkar pawhin Zirna tihhmasawn chu a dah pawimawh a, " Kan zirna te tha taka kalpui chhunzawm a nih theih na turin Mizo society, kan nitin chawei danphung leh khawsak dan te milin sikul kal hun pawh, session thar atanga hman tan turin siam that a ni", a ti.

Zirna huangah Mizoram leh Mizo mipui te tan Monfort Brothers ten a thawhhlawk hle a ni tih a sawi a. Zirna tha, man tlawm si a an kalpui thei chu an fakawmin midangte tan pawh an entawntlak a ni a ti. " Chhungkua, khawtlang leh state angah pawh mithiam, dinhmun pawimawh luah thei te an lo tam hian hma kan sawn zual sawt thin a. Mahse, tuna kan dinhmun en chuan khua leh tui te tana pawimawh, hna pawimawh bik kan tih DC, SP leh hnasang zawkah te chuan All India Service kan neih tawh meuh loh avangin Hnamdangte heng hna pawimawh te luahin an thu tan ta a. Hei hi ram leh hnam humhalhna kawngah thil pawi tak a ni thei a ni. Khawtlang leh kohhran rawngbawlna huangah te pawh, kan mithiam neih, khalhfal phu te chu All India Services leh hnasang zawk hmu thei tura kan beisei a nih chuan chung mite chu kan awl thiam a hun tawh a. Kan mithiam neih te awlna chang kan hriatloh chuan kan hmabak a englo hle a ni", a ti.

Monfort Academy leh Monfort School building thar  Pathian hnena hlanna leh hawnna pual hian sikul chhungah cultural programme tawi buatsaih a ni a.Bro.Jose Thekkedam, Principal, St Paul's HSS & Monfort Academy chuan programme a kaihruai a. Cultural item hrang hrang bakah khualzahawm Most Rev Stephen Rotluanga, Bishop of Aizawl, Rev. Bro. MK. Devassy, Provincial Superior, Montfort Brothers leh khawtlang hruaitute lam atang te pawh thu sawi ngaihthlak a ni. Kum 2009 a din, Montfort Academy hi CBSE hnuai a nih laiin kum kum 1997 a din, Monfort School chu MBSE hnuaiah a awm thung a. Tun dinhmunah Monfort Academy-ah hian zirlai 250 leh zirtirtu 15 awm mekin LKG atanga pawl 8 zirna thleng kalpui mek a ni a. Monfort Schoolah hian zirlai 105 leh zirtirtu 7 awm mekin pawl 5 atanga pawl 8 thlenga zirna kalpui a. He school building hawn tharah hian  elevator te thlenga dah a ni a, a hmunhma hi zirna atana mi thahnem ngai tak, khawtual mi, Pu Chaldailova hnen atangin man tlawm te a lei a ni. A sakna sum hi Monfort Brothers ten an zirna in enkawl atanga sum tling khawm te leh mi tlawmngai te thilpek atanga hmuh a ni a;  I&PR Minister Pu Lalruatkima pawhin a ma pualin tanpui sumfai vawiin khan Monfort Academy sak chhunzawmna turin a thawh ve nghal a ni.