3792/2022-2023

Champhai, the 9th March, 2023: Champhai District chhung Chawngtui East khua kum 125 (1898-2023) tlin leh, zoram buai avanga khaw khawm haw kir leh kum 50 (1973-2023) tlin lawmna, Chawngtui Community Hall-a neih chu vawiin khan Art & Culture Minister Pu R.Lalzirliana chuan khuallian niin a hmanpui a; a hriatrengna lungphun a hawn bakah souvenir 'Chawngtinleri vangkhua Chawngtui East' tih chu a tlangzarh bawk a. He hunah hian East Tuipui bialtu MLA Pu Ramthanmawia, Vice Chairman, Bamboo Link Road Board chu khualzahawm a ni.

Khuallian Art & Culture Minister Pu R.Lalzirliana chuan Chawngtui East khuain hun pawimawh tak an hmang thei chuan inlungrualna leh ropuina a lantir thu sawiin, kum 125 na hmel leh ram buai khaw khawm haw hnu atanga kum 50-na hmel an hmu thei chu a lawmpui takzet thu a sawi a. Pathianin ram tha tak leh mawi tak min pek hlut thiam a pawimawh thu sawiin, Chawngtui East chu khaw lian lo tak ni mah se, tawnhriat ngah tawh tak a nih angin ei leh bar dehchhuah kawngah te, mizo nun zemawi chawisan kawngahte midangte zirtirtu a nih theih thu a sawi a. Zonun zemawi tak tlawmngaihna, dikna, huaisenna, inlungrualna leh a dangte chhawmnung zel turte leh ruihhlo laka fihlim turtein a chah a. P&E Department changtu Minister ni bawk chuan Mizorama hmun 11 ahte MW 52 siam chhuak thei tur Solar project buaipuia hmalak a nih thu a sawi a; MW 20 pe chhuak thei tur Vankal Solar Park trial run neih tawh niin, tun atanga hun reiloteah hawn tum a ni, a ti a. Pipu sulhnu tamna tuipuiral tlang dunga pipu sulhnu venhim leh enkawl kawngah Art & Culture Department kaltlangin theihtawp chhuah zel tum a nih thu a sawi bawk.

Khuallian chuan zirna leh khawtlang siam thatna kawngah theihtawp chhuaha hmalak a tul thu leh, thangtharte zingah zonun zemawi inzirtir tam a pawimawh thu a sawi a. Mizo hmeichhiate hmasawnna chhuanawm a tih thu leh mipate aia an nep bik loh thu sawiin, innghahnatlak leh rintlak ni tura mizo mipate tanlak nasat a pawimawh thu a sawi a. Nu leh pate, rual u zawkte atanga thurawn lak leh an thu awih chu hlawhtlinna atana kailawn pawimawh hmasa a nih thu pawh a sawi a. Khawchhak tlangdung chu pipu sulhnu tamna leh zonun zemawi chhawmnun tlatna hmun a nih thu pawh sawiin, Chawngtui East khaw mipuite chu zonun zemawi nunpuia chhawmnung zel turin a chah a ni.

Khualzahawm East Tuipui bialtu MLA Pu Ramthanmawia chuan a bial chhunga Chawngtui East tana ni pawimawh tak Art & Culture Minister-in khuallian ni a a hmanpui thei chu lawmawm a tih thu a sawi a. Chawngtui East khuain hun pawimawh tak an thleng thei chu a lawmpui thu a sawi a. Hun hrehawm leh harsa tak tak; lirnghing, hrileng leh thenawm rambuai avanga raltlante East Tuipui bialin a tawh nasat thu sawiin, harsatna tawh lai pawhin Sawrkarin mipuite hmakhua ngaiin theihtawp a chhuah zel thin thu a sawi a. Chawngtui East khaw mipuite chu ram leh hnam tana mawhphurhna nei an nih hriaa theihtawp chhuah turin a chah a ni.

He hun hi Pu Thlengliana'n kaihruaiin Upa Vailianchhawna'n hunserh a hmang a, Organizing Chairman Pu Thangropuia, VCP Chawngtui East-in inlawmna thu a sawi a. Organizing Secretary Pu JH Lalkrosthanga hnen atangin report ngaihthlak a ni a. Minister tawiawmtu Health & Family Welfare Board Vice Chairman Dr. ZR Thiamsanga, Champhai North bialtu MLA in lawmpuina thu a sawi bawk.

Chawngtui East hi Champhai District Khawbung RD Block huamchhunga awm niin, 25-East Tuipui Assembly Constituency hnuaia awm a ni a. Tun dinhmunah in 67 awmin mi 350 bawr vel an cheng mek a ni.

He hunah hian Pu TC Pachhunga, Ex MLA & Vice Chairman, Sports & Youth Affairs, Tourism and ICT Board; Pu James Lalrinchhana, District Bawrhsap; Pu Lalrinpuia Varte, SP Champhai leh Official dangte pawh an tel a ni.