3793/2022-2023

Dated Serchhip, the 9th March, 2023: Vawiin chawhnu dar 1:00 khan District Project Office, Women & Child Development, Serchhip District huaihawtin International Women’s Day 2023 hman a ni a, Pi Lalzikpuii, SDO (Sadar) Serchhip chuan khuallian niin a hmanpui.

Khuallian chuan, Internatioan Women’s day chu khawvel puma hman a ni a, ni ropui tak a ni. He niah hian hmeichhiate kan hlutzia hre thar lehin inhrilh thar ang u. India ram zau zawkah hmeichhiaten hmasawnna hmel an hmuh hleihtheih loh laiin Chanchintha avangin Mizoramah hmeichhiaten nasa takin hma kan sawn a, chanchintha thlentute hlutzia a lang fiah thin a ni. Vawiinah chuan kan ramah hmeichhiaten hna zahawm leh tha tak tak an thawk a, kohhran leh khawtlangah te, infiamna kawngah te pawh hmeichhia ten hma kan sawn nasa em em a. Ram hruaina hna thleng pawhin dinhmun pawimawh kan luah a, mipate tih theih ang kan ti ve thei vek a, tun aia dinhmun tha zawkah pawh kan la awm zel ka beisei ani, a ti bawk. Kan ram dinhmun chhe tak siam tha turin nute an pawimawh hle a, kan ram chhanchhuah nan theihtawp chhuah turin kan tu leh fate atangin tan la thar theuh ang u, tiin nute a chah a ni.

Khualzahawm Pi R. Lalmuankimi, Deputy Director (A) Women & Child Development pawhin thusawiin, International Women’s Day hi hmeichhiate tan ni ropui tak a ni a, Mizote pawhin hlut nachang kan hre ve zel a, a lawmawm hle a ni. Pathianin hmeichhiate a siam danah mipa aia awm nem zawk ni mah ila, rilru leh theihna zawng zawng hmanga a taka hna kan thawh chuan chhungkaw leh khawtlang kan khaiding thin si a ni. Pathian thu angin hmeichhe lu mipa a ni tih erawh vawng reng ang u, a ti a. Kan hmeichhe puiten dinhmun tha zawk an luah theih nan tan la ila. Tin, Mipa te pawhin nute leh nupuite an zahthiam chuan chhungkaw hlim khawtlnag nuam kan nei thei ang, a ti a ni.

He hunah hian thupui atan “DigitALL: innovation and technology for gender equality- Hmasawnna thil thar leh khawl hmanga thiamna te hmeichhia leh mipa intluktlanna atan” tih hman a ni a. Thupui hi Resource Person- Pi K. Laldinpuii, Ex-Principal, Government Serchhip College, Pi Caryll Lalpari, CDPO Serchhip ICDS Project leh Pi C. Lalruatsangi, BMM, MzSRLM Serchhip ten an sawi a ni.

Inlawmna thu sawitu Pi F. Hmingthankimi, DMC (DHEW) Serchhip District chuan International Women’s Day chu nimin ni 8 March kha a ni a, sawrkar chawlh anih avanga a ni taka hman a rem lova, vawiinah kan hmang ta a ni, a ti a. Kalkhawmte chu he ni hlawk taka hmang turin duhsakna a hlan a ni. He hunah hian Nl. K. Zairempuii, Serchhip Vengchung, Gold Medalist, Mizoram Open Boxing Championship 2023 pawhin thu sawiin, khuallian Pi Lalzikpuiin lawmpuina thilpek a hlan a ni.