3794/2022-2023

Champhai, the 9th March, 2023: Art & Culture Minister Pu R. Lalzirliana chuan tukin khan Vaphai Lal Muala Market Shed, MG-NREGA sum cheng nuai 11 senga sak a hawng a, Thlangtlak mual tlawhin hmalaknate a enfiah a. Chawhnu lamah Samthang khua tlawhin Pu Zoramthanga Rûn a hawng bawk.

Art & Culture Minister Pu R.Lalzirliana chuan Vaphai Lal Muala Market Shed tha tak hawn a ni chu lawmawm tiin, hmasawnna ruhrel siamna atana sum lokalte a nihna ang taka hman a ni chu fakawm a ti a. Midangte sawisel mai lova finchhuahtu leh thurawn petu nih a pawimawh thu sawiin, mipuite chu rinawm leh taima taka hlawh hmu tlaka hna thawk turin a chah a; Sawrkarin mamawhte a ngaihtuah pui zel dawn a ni, a ti. Kalkhawmte chu midangte tana malsawmna leh innghahna nih tum tlat turin a chah nghal bawk.

P&E Minister ni bawk chuan Vaphai Hmawngpui zaua leilet siamtute power supply pek nan 100 KVA Transformer bun tuma hmalak a nih thu a sawi a. P&E Department kaltlanga Sawrkar hmalakna leh hmachhawp hrang hrangte a tarlang bawk a. Mizoram chhunga leilet zau hrang hrang 26 ah power supply pek hna kalpui mek a nih thu leh, heng bakah hian hmathar la turin zau hrang hrang 51 ahte cheng vaibelchhe 26 senga hmalak tuma ruahmanna siam a nih thu a sawi bawk.

East Tuipui bialtu MLA Pu Ramthanmawia, Bamboo Link Road Board Vice Chairman chuan Vaphai khaw hulum laia Market Shed thar tha tak sak zawh fel a ni chu lawmawm a tih thu a sawi a. Bazar mai bakah khualchhawnna leh hun pawimawh hman nana tangkai thei tur a nih thu sawiin, hmasawnna hna thawh tur a la tam avangin lungrual taka tanrual a pawimawh thu a sawi bawk a. Pradhan Mantri Jan Vikas Karyakram (PMJVK) kaltlangin Champhai District-ah hmalak tuma project hrang hrangte thehluh a nih thu tarlangin, a bial chhungah mikhual thlenna tur Travellers' Inn leh Homestay sakna tur te, zirna in leh health facilities tihchangtlunna tur te, infiamna ruhrel hrang hrang siamna tur te, pipu sulhnu humhalhna tur leh hmasawnna ruhrel pawimawh dangte thawhna tur project thehluh a nih thu a sawi bawk.
Vaphai Market Shed sak hawnna hun hi Pu Thangngaihzuala, Vaphai VCP chuan kaihruaiin Vaphai khuaa Sawrkar hmalakna leh hmachhawpte a tarlang a. Pu C.Zakanglova, Thlangtlak Mual Committee aiawhin inlawmna thu a sawi a. P&E Minister ni bawk hmalak sakna avangin Hmawngpui zau FMC ten lawmthu an sawi bawk.

Chawhnu hian Samthang khua tlawhin CM Pu Zoramthanga Chawimawina Organising Committee, Samthangte bultuma sak Pu Zoramthanga Rûn sak a hawng a; Pu Zoramthanga chanchin ziahna lehkhabu an buatsaih pawh a tlangzarh nghal bawk.

Pu Zoramthanga Rûn, Samthang Volleyball Court bula sak hawnna program hi Pu C.Lalrintluanga, Vice Chairman, CM Chawimawina Organising Committee chuan kaihruaiin Upa DL. Vanlalrova, Adviser, CM Chawimawina Organising Committee-in hunserh a hmang a. Pu Zoramthanga chanchin ziahna lehkhabu thlirlawkna leh Pu Zoramthanga Rûn sak chungchang technical report PC Lalhlimpuia, Chairman, CM Chawimawina Organising Committee-in a nei a ni. Tarlan a nih danin Pu Zoramthanga Rûn sakna tur hmunhma leina tiamin senso zawng zawng zat hi Rs 10,56,115/- a ni a; Committee hnatlang vawi 3 koh niin, hnatlang inchhawk neih a ni bawk.

Art & Culture Minister hi East Tuipui bialtu MLA Pu Ramthanmawia, Vice Chairman, Bamboo Link Road Board; Dr. ZR Thiamsanga MLA, Vice Chairman, Health & Family Welfare Board; Pu TC Pachhunga, Ex MLA & Vice Chairman, Sports & Youth Affairs, Tourism and ICT Board; Pu James Lalrinchhana, District Bawrhsap, Pu Lalrinpuia Varte SP leh Official dangten an tawiawm a ni.