Vawiin khan Govt. T.Romana College chuan Vanapa Hall-ah Freshers' Social cum Farewell an hmang a. Art & Culture Minister Pu P.C.Zoramsangliana chu Khuallian a ni.
Thu sawiin Pu Zoramsangliana chuan Mizoram-in mamawh lian tak a neih chu thalai hman tlak a ni, a ti a. College zirlai te chu tuna an hun tha hi ram tana mi hman tlak ni tura inchher nan hmang tangkai turin a chah a. Thalai te zingah lehkha zir sang, chhawr tlak si loh te, leh mahni hnam nunphung pawh hre mumal lo an tam tih sawiin Pu Zoramsanglian chuan Mizo hnam a ral lohna turin thalai ten hnam ziarang leh incheina te an chhawm nun zel a pawimawh tak meuhva ni, a ti a. Sorkar college te hnena ngenna a siam ngai pawimawh a Champhai college in kar khata puan bih ni an siam leh, T. Romana college Freshers social-ah hmeichhia ten puan an bih vek chu lawmawm a tih thu a sawi. Pu Zoramsangliana chuan Mizoram-in cheraw hmanga world record a siam atangin Mizo hnam culture leh tradition ngaih hlutna kawngah thalai te an harh thar nasa hle a ni, a ti a. Mizoram chu India ram bung khat a nih angin Mizo ten he rama thil tha leh Mizo hnam ze mawi tak hi India ram hmun tinah kan pho lang zel tur a ni, a ti bawk. Pu Zoramsangliana chuan T.Roman College tan hian tui dahvawhna, water cooler a pe a ni.
T.Romana College Principal Dr. F.Lalhmingsanga chuan zirlai lut tharte lawmna thu sawiin college-a zirna boruak tha leh a thlawna hman theih, computer leh internet facility te, library changtlung tak te chu a hlawk thei ang bera chhawr tangkai turin zirlaite a fuih a. Zirlai an pun nasat avangin zing dar 6 - tlai dar 4 thleng college hunbi pawhsei a tul thu leh hemi kawnga zirtirtute inpekna chu chhuanawm a tih thu a tarlang a. Ruihhlo a fihlim lote lakah college chu a khauh hle dawn tih a sawi bawk.
Govt. T.Romana college ah hian kumin ah zirlai 905 awmin lut thar 337 an awm a. Vawiina Freshers' Social hi Students Union Leader Vice President, Lalengzuala Pautu-in a kaihruai a. Kum 2010-2011 chhunga zirlai boral C.Vanlalfela IIIrd Year result nghak lai sunna hun hman a ni a. Mizo Cultural Organization ten awareness campaign an nei bawk a ni.
