Vawiin dar 1:00 khan Pu J.H. Rothuama, Land Revenue & Settlement etc. Minister hovin Secretariat Conference Hall-ah Revenue Department Study team te an thukhawm. He Meeting ah hian Pu John Siamkunga, MLA; Pu R.L. Rinawma, Secretary, Revenue; Pu P. Chakraborty, Principal Secretary, Law; Pu R. Lalhmangaiha, Director, Revenue; Pu RS Lalzamliana, Dy. Secretary, Revenue; Pu V. Lianzinga, Joint Director, Revenue; Pu K. Sangthuama, Under Secretary, Revenue; Pu SL Sailova, IAS (Rtd); Pu Denghnuna, IAS (Rtd.) leh Pu H. Raltawna, IAS (Rtd.) te an tel a ni.
He meeting-ah hian Study Team hian The Mizoram Land & Revenue Bill chungchang ngaihtuah ho a ni a. Mizoram leilung te survey chhuah vek a, uluk taka chhinchhiah anih theih dan tur te, sorkar Department hrang hrang - ram leilung enkawlna kawnga mawhphurhtu bik Revenue Department, LAD leh E & F Department te inpawh tlang zawka thawhho dan tur siam chungchangte sawi a ni a. Ram in pek thuah leh ramri fel lo zawng zawngte leh mimal ram neih theih chin zau zawng chungchangte ngaihtuah ho a ni. Dan hi siamfel thuai tura chak taka hmalak mek a ni a, peih fel thuai anih theih nan 29.7.2011, dar 1:00 PM hian Study Team hi thutkhawm leh nise tih a ni.
