Vawiin chhunah khan Tourist Lodge, Chaltlangah Mizoram State Sports Council (MSSC) General Body Meeting neih a ni a. Sports & Youth Services Minister Pu Zodintluanga, President, MSSC chuan he Meeting hi kaihruaiin meeting-a tel te lawmna thu a sawi.

Sports Minister Pu Zodintluanga chuan MSSC hnuaia Sports Association hrang hrangte thawhhona a tha tih sawiin MSSC hruaitu atan tu pawh thlan ni se thawhhona tha hi chhawm nun zel a tul tih a sawi a. YMA leh tawmngai pawl dangten mutmawh hnarmawh bera an neih chu thalaite hi an ni a, Sports Association hrang hrangte hian infiamna hmangin naupang kan chhanchhuak a, kan thawh rah hian thalaite a khawih tiin a sawi a ni. Infiamna hmanga naupangte ngaihsaka 'Catch Them Young (CTY)' policy kalpui mek hian kan khawtlang nunah nghawng tha tak a nei mek a, he ram hruaitu turte chherchhuak tur hian a bultumtu kan ni a ti a. CTY chu thalaite nun siamthat nan nasa leh zuala kalpui a tul tih sawiin MSSC hmalakna chu infiamna lama hmasawnna leh changtlunna ringawt ni lovin ram leh hnam tan a pawimawh a ti bawk.

Pu Lianzuala, Secretary, MSSC hnen atangin report ngaihthlak a ni a. MSSC Annual Programme 2011-2012 chu sawi ho hnuah pawm a ni bawk. MSSC hmalakna avangin Mizoram aiawha infiam/inkhel tura kal infiammi te leh Coach leh Manager te chu Mizoram House hrang hrangah Sorkar Official anga enkawl an ni tawh dawn a. August 2010 - June 2011 chhung khan Mizo infiam mi ten International level-ah Gold 1, Silver 4 leh Bronze 9 an la a; National level-ah Gold 81, Silver 46 leh Bronze 51 lain Regional inelna hrang hrangah Gold 44, Silver 25 leh Bronze 16 an la bawk a ni. 

Chawhnu lamah MSSC Vice President leh Joint Secretary turte thlan an ni a. Inthlanna hun hi Pu Lawmthanga, Addl. Secretary, Sports & Youth Services Department in a kaihruai a, 4th MSSC Vice President atan Pu Rotluanga Fanai (Cricket Association of Mizoram) chu thlan niin Joint Secretary atan Pu John Kima (Mizoram Snooker & Billiards Association) thlan a ni bawk.