1305/2024-2025

Aizawl 25th July, 2024 : Vawiin khan N.J. Yasaswy Memorial Auditorium, ICFAI University, Durtlang North-ah International Seminar on Mizo Tobul Chhuina (Tracing the History and Origin of the Mizo People), Tribal Research Institute, Art & Culture Dept. Govt. of Mizoram leh Department of History and Department of Mizo & Cultural Studies, ICFAI University, Mizoram tangkawpin an buatsaih chu Pu C. Lalsawivunga, Art & Culture Minister-in khuallian niin a hmanpui. 

Khuallian chuan Mizote hian kan nihna tak tak hrechiang tur chuan kan paltlang tawh te kan hriatchian a ngai a. Thlang kan tlakna kalkawnga hnam hrang hrang te nen kan inawmpawlh dan te thlengin zir tur leh chhut tur a tam em em a ni tiin Zohnahthlak unaute'n harsatna namen lo an tawk a, kan ram ngeiah pawh Zofate In pui tiin mi tam tak an rawn tlan khawm a, hetiang anih avang hian mi tam tak thinlungah hnam chungchanga harh tharna - hnam movement a thleng mek a ni a ti. Kan History chu ziaka inhlanchhawn ni lovin thu a inhlanchhawn a ni a. Rilru tihtakzeta seng a, kan tobul ziaka dah that en let tur awm lo mahse, kan pipute sulhnu leh tobul document te awmna a hmun ngeiah kalchilh a, kan chhui chian a pawimawh hle a. Rilru awn bik leh herlam nei lova kan history te kan historian te'n chhui se a duh thu a sawi a. Seminar avang hian hnamah harhna thleng se, Zohnahthlak te pawh hmun dangah awmin tawng te danglam hlek mahse unau vek kan ni tih hre thar tura chahin Seminar chu kan tobul, kan history dik chhuina bultanna ni turin duhsakna a hlan a ni. 

Seminar hi nihnih awh tur niin a ni khatna vawiin hian Prof. Jangkhomang Guite, Nagaland University hnen atangin "Myth, Legend and History : Recent Trends in the Study of Origin and Migration in Notheast India" tih thupui hmanga paper buatsaih ngaihthlak a ni a. Dr. Lalrinnunga Hmar, Mizoram University hnen atangin " Early Migration of the Mizo People" tih thupui hmanga paper buatsaih ngaihthlak a ni bawk. Ni khatna-ah hian Moderator atan Dr. Laithangpuii, Asst. Professor, ICFAI University leh Pu Vanlaltana Khiangte, Asst. Professor, ICFAI University te hman an ni. 

Ruahman lawk ang chuan naktuk Seminar hi Pu Gen Khan Do, Jt. Director, Art & Culture Department chuan a kaihruai ang a. Pu Laldova, Mizo Historian, Myanmar chuan "History of Chittagong Hill Tracts: A chhunga Zofate Chanchin" tih thupui a sawi ang a. Pu Liandova, Aizawl chuan "Hmasang Pipute Chanchin" tih thupui a sawi bawk ang. Pu Lalrammawia Ngente, Associate Professor, Govt. Johnson College leh Dr. Laithangpuii, Asst. Professor, ICFAI University te Moderator niin thupui sawihawnna an kaihruai dawn a ni. 

Tun dinhmunah ICFAI University-ah hian zirlai 400, Teaching Staff 60 leh Non Teaching Staff 20 an awm mek a ni. 

Seminar hi Pi Carol VLMS Dawngkimi, Director, Art & Culture Department chuan a kaihruai a. Pi Lalhmangaihi, Translator, Tribal Research Institute, Art & Culture Department chuan Seminar report tawi a pe bawk. He hunah hian Mizo Academy Letters (MAL) Mizo Writers Association, INTACH Mizoram Chapter, Mizo History Association, Zoram Research Foundation leh MZU a Department of History & Ethnography bakah Mizo Department Faculty leh Research scholar leh ICFAI University zirlaite an tel a ni.