1306/2024-2025

2024 Vawkhniahzawn thla ni 25: Vawiin khan Lunglei High Powered Committee Vice Chairman, Lunglei North Bialtu MLA Pu V. Malsawmtluanga chuan Government J. Buana College (GJBC)-in zirlai tharte lawmna hun, "Freshers' Social" an buatsaih chu Khuallian niin a hmanpui.

Govt J. Buana College Multipurpose Hall-a Freshers' Social hun hmanah hian Khuallian Pu V. Malsawmtluanga chuan Govt JB College zirlaite leh zirtirtute chu result ṭha tak an neih ṭhin avanga chhuanawm a tih thu sawiin, ram tana mi chhenfakawm tak tak chher chhuahna hmun ni zel turin duhsakna a hlan a. Mizoramah sawrkar thar a pian veleh sawrkarin inrenchem a kalpui nghal tih sawiin, MLA-te puitu (MR) tihtlem te, MLA-te'n sawrkar suma lirthei thar lei loh tih te kalpuiin, Minister, MLA leh Group 'A' officer-te'n sawrkar aṭanga ration buhfai an lak ve ṭhin titawp tura hma lakna kalpui mek a nih thu te a sawi a. He inrenchem azarah hian sawrkar sum luang ral tur tam tak hum a nih thu leh chumi avang chuan tun hnaiah casual teacher lak theih phah a nih thu te, recruitment dan felfai tak hmanga lak an nih avangin sawrkar sum dinhmun azira la dah ngheh theih tura ruahman an nih thu te sawiin, hna dang dang pawh a tahtawla lak belh chhoh zel a nih dawn thu a sawi a. Sawrkar tharah tihpuitu neih ṭhat (political fitness) vanga tlin a awm dawn loh avang leh a thiam thiam leh thawk rim rimte'n hna an hmuh dawn avangin an zirlaiah theih tawp chhuah a, beiseina nei chunga hma lam thlir turin zirlaite chu a chah a ni.

Khuallian Pu V. Malsawmtluanga chuan ama tawn hriat aṭanga zirlaite fuihna thu sawiin, MLA-a tling turin mi mut laia rim taka hna an thawh ṭhin thu a sawi a. Bible-in "thawh rimna zawng zawngah hlawkna a awm" a tih angin thawk rim tur leh mu tam lo turin zirlaite chu a chah a. Tum fel tak nei tur te, a ṭul hunah erawh chuan dinhmun azira tum thlak ngam tur te, zirlai nih laia an subject-a tel lo ngaihzawng neih thupui lo tur te, Bible chhiar tam tur te, finna neitu Pathiana innghat tlat tur leh thu awihna nunpui tur te'n a fuih bawk.

Govt J. Buana College Freshers' Social-ah hian Students' Union (SU) Vice President Isaak Rothangpuia chu chairman niin, Lallianpuii (V Sem) chu compere a ni a. Evangelical Union (EU) Vice Chairman Lalrinzuala'n hunserh hmangin, EU Choir te'n hawnna hla an sa a. Principal Pu Lallianzuala'n inlawmna thu leh zirlaite fuihna thu a sawi a. SU Games & Sports Secretary Lalhruaikima Pachuau kaihhruaiin college zirlai thar (I Semester zirlai)-te'n college an kal chhunga an zawm tur thu an tiam bawk.

He hunah hian GJBC ICT Committee-in an buatsaih GJBC official alumni portal leh Magazine Editorial Board-in an buatsaih GJBC 23rd Annual Magazine 2023-24, "Leitlang Dingdi" te chu Khuallian Pu V. Malsawmtluanga'n a tlangzarh nghal a. Dr Vanlalmuana'n alumni portal chungchang hi sawi zauvin, Magazine Editor (2023-24) Lalzeliana chuan annual magazine chungchang report a pe a. GJBC Principal hlui, Prof. J. Zorema Proficiency Award 2024 sem niin, award-in a ken tel trophy leh pawisa fai chu MZU Under Graduate Examination 2024-a ti ṭha zual mi pathum - Lalkhawngaihi, 5th rank (Economics); C. Lalchhanchhuaha, 8th rank (Political Science) leh K. Lalpekmawii, 5th rank (Mizo) te hnenah hlan a ni a. SU Vice President kal chhuak (2023-24) Laldawngkima'n zirlaite fuihna thu a sawi a. GJBC cultural troupe te'n chheih lam entirin, Isabel Lalnunpuii (III Sem) leh VL Hmangaihzuali (I Sem) te hnen aṭangin malzai ngaihthlak a ni a. SU General Secretary Benjamin Malsawmpuia'n lawm thu sawiin hun a khar a ni.

Govt J. Buana College hi kum 1983 khan din niin, nikum khan kum 40-na (Ruby Jubilee) an lawm tawh a. Government Online Excellence Awards 2023-24 sem zawh takah khan Govt J. Buana College website chu official institution website 45 zingah 7-na a ni.