Vawiin chawhma khan Art & Culture Minister Pu R. Romawia’n Lungleiah Art & Culture Department hnuaia Cultural Heritage Centre a hawng.

Khuallian Pu R. Romawia chuan Cultural Heritage Centre hawn theih a a awm chu lawmawm tiin, Pathian in hnam ze ropui tak min pe a, chu chu kan chhawm nun a kan pholan zel a ngai a ni, a ti a. Kan ram leh hnam zia a ral mai loh nan theihtawp a kan humhalh a, kan chhawm nun zel a pawimawh a ti. Hemi kawng ah hian Art & Culture Department pawhin theihtawp an chhuah a ngai a ni, a ti a. Centre chu mahni ta theuh anga ngai a, uluk leh dimdawi taka hmang tlang turin a chah a ni.

Khualzahawm Pu H. Zothangliana, Parliamentary Secretary, Art & Culture Department pawhin department-a thawktute thahnemngaihna avanga centre chu hawng thei an nih thu a sawi a. He Centre hmang hian thangtharte tana zai leh lama hmasawnna thlentu a nih a beisei thu a sawi. Art & Culture chu department lian lo tak ni mahse, an bial a zau in, hmun hlui te enkawl leh vawnhim, library leh museum te enkawl bakah Zofate nunzia vawn nun zel thleng in an vaihma vek a, an inpekna zar ah hma kan sawn belh zel a ni, a ti.

Pu Chalrosanga, MLA pawhin Art & Culture department te hmalakna chu a ropuiin, Cultural heritage Centre hian an thawhrimna a tilang a ni, a ti.

Art & Culture Secretary Pi Thanhliri Pachuau chuan Cultural Heritage Centre hawnna inkhawm hi a kaihruai a, Art & Culture Director Pu R. Hmingthanzuala’n lawmthu sawiin a khar a ni.

Cultural Heritage Centre hi 13th Finance Commission hnuaiah cheng nuai 300 seng a sak niin, 628.64 square meter a zau a ni a. Dance & music training-na, Conference Hall leh lirthei park-na te a awm a ni.