Agricultural Technology Management Agency (ATMA) Deputy Project Director, Block Technology Manager, Computer Programmer, KVK Scientist-te bakah Agriculture leh Allied Department a thawktute tama tana training buatsaih chu vawiin khan Agriculture Directorate Conference Hall-ah khar a ni a. ATMA State Nodal Officer Dr. C. Lalzarliana, Director of Agriculture (Crop Husbandry) ni bawk leh Dr. H.C. Bhattacharya, Director of Extension, Assam Agricultural University, Jorhat, Assam te’n an hmanpui.

Dr. C. Lalzarliana chuan Agriculture leh leh a kaihhnawih sector hrang hrang ten Skill Development an kalpui tan tur chu lawmawm a tih thu sawiin Trainees te chu an thil zir te thingtlang thalai tana a tangkai thei ang bera hmang turin a chah a. Dr. H.C. Bhattacharya, Director of Extension, Assam Agricultural University, Jorhat pawhin trainees te fuihin sawrkar laipui hmalakna tihlawhtling tura a fawng pawimawh tak chelhtute an nih avanga training pek an nih thu leh training chhunga an thil zirte tangkai taka thingtlang kuthnathawktute tana hmang turin a chah bawk.

Ni li (4) awh training hi Extension Education Institute (EEI), North East Region, Assam Agriculture University, Jorhat leh Mizoram Agricultural Management & Extension Training Institute (MAMETI), Directorate of Agriculture tangkawp in an buatsaih a ni.