January ni 27-29 chhunga neih Manipur Group YMA Annual Conference vawi 25-na chu Santing, Manipur-ah neih niin Art & Culture Minister Pu PC Zoramsangliana chuan khuallian niin a hmanpui.

Minister chuan Zo hnahthlak hmun hrang hranga mite chu an awmna hmun theuhah an him in an thlamuang tur a ni, a ti a. Mizoram chu Zofate Inpui, an Jerusalem a nih avangin Pu Lal Thanhawla kaihhruai Mizoram sawrkar chuan Zo hnahthlak khawikipa mite tan pawh a tul ang zela hmalak a inpeih reng a ni, a ti. YMA member kalkhawmte chu khawtlang nun siamthat kawnga an hmalakna turah mimal leh chhungkua theuha bul tan tur leh, ruihhlo avanga thalaite piansualna tam tak hre reng chunga nun uluk turin a fuih bawk a ni.

Minsiter hi bialtu MLA leh Churachandpur DC ten an tawiawm a, Conference-ah hian Manipur Group YMA huamchhung branch hrang hrangte chuan hnam lam chi hrang hrang entirin lenkhawm zai intihsiak pawh an nei bawk a ni.

Pu PC Zoramsangliana hian Imphal leh Lamka-a Mizoram House hmun tur pawh tlawhin Regional Institute of Medical Science-a Mizo zirlaite pawh a titipui nghal bawk a. Churachandpur hmuna Salvation Army enkawl Motherless Home tlawhin, cheng sanghnih a hlan bakah, Churachandpur DC hnenah an thlatin quota tur buhfai, chini leh khawnvartui a ngensak chu DC chuan tihsak a tiam a. Manipur sawrkar Mizo Minister Pu Phungzathanga, Power changtu pawh a kawm nghal bawk.