3370/2024-2025

Dated Aizawl, the 5th December, 2024: Vawiin chawhma dar 10:30 khan Art & Culture Minister Pu C. Lalsawivunga chuan Mizo History Association (MHA) Annual COnference vawi 44-na leh 'Rewriting Mizo History' tih thupui hmanga Pachhunga University College (PUC) Seminar Hall-a MHA-in seminar an buatsaih chu Khuallian niin a hmanpui a, Historical Journal, Mizoram 2024 a tlangzarh nghal bawk a ni.

Kalkhawmte hmaah hian khuallian Minister Pu C. Lalsawivunga chuan thusawiin, Mizo History Association, pawl hlun leh upa tak mai chu ngaihhlutawm a tih thu sawiin, pawl member-te chu an pawimawhna leh ram tana an hlutnate hrenawn fo turin a chah a. Minister chuan MHA member-te chu Mizoram leh hnam tana history dik leh belhchian dawl zawk a lo awm theih nana ke penpui tura sawmin, mumal leh tha zawka Mizo hnam history ziah that leh chu thil veiawm tak a nih thu a sawi a. Hemi atan hian vawiina seminar buatsaih chu hmasawnna rahbi pawimawh tak ni a a ngaih thu a sawi a. Ziak mi leh zirbing mite chu, ram leh hnam tana an hlutzia inhre nawn fo tura chahin, MHA member-te chu duhsakna a hlan nghal bawk a ni.

Conference leh Seminar hawnna hun hi  Prof JV Hluna, Vice President, MHA chuan kaihruaiin, Dr. Benjamin Ralte, Secretary, MHA chuan Mizo History Association chungchang report a pe a. Prof. Sangkima, President, MHA chuan Presidential address neiin, Mizo hnam chanchina Pu R. Vanlawma sulhnute tih thupui hmangin paper a present a. Hemi hnu hian Historical Journal Mizoram tlangzarh niin, Prof. Malsawmliana, Joint Secretary, MHA chuan lawmthu sawiin hun hi a khar a ni.