3371/2024-2025

Dated Hnahthial, the 5th December, 2024: Vawiin kha Hnahthial DC Meeting Hall-ah Bawrhsap Pi Rita Lalnunmawii Pachuau kaihhruaiin Hnahthial District Disaster Management Authority (DDMA) leh Village Level Disaster Management Committee (VLDMC) te an thukhawm a. Kangmei lakah fimkhur a tulna leh kangmei vanga chhiatna thlen palha thuneitute hnena in report dan tur te kimchang zawka inhrilhhriatna hun hman a ni.

Bawrhsap chuan fur khuaa leimin loh nana kan fimkhur ang chiah hian thal a lo nih hian kangmei lakah pawh fimkhur a tul a ni a ti a. Kangmei vanga chhiatna a lo thlen hian zangnadawmna dawn theih (relief fund) chu a bei tham thin avangin kangmei chhuahtir loh hram hi duhthusam anih thu a sawi a. Ran vulhna hmun, a bikin ar in leh vawkinah te bulb puak vang leh vawk chaw chhumna mei vil that loh avang ten kangmei a chhuah thin thu sawiin ran vulhtute pawh an fimkhur lehzual a tul thu a sawi a. Current kal sual hi in kang tam tak siamtu anih avangin in lama wiring pawh mahni thiam dan dana lo zam ve mai lo turin leh mi thiam tak tak chauh wiring khawihtir ni se a duh thu a sawi a. Mipuite kangmei laka an fimkhur zawk theih nan khaw tina VC te chu a theih ang anga hma la turin a chah nghal a ni.

Bawrhsap chuan kutpui pahnih, Krismas leh Kumthar a lo hnaih tak avangin District mipui ten nuam tak leh ralmuang taka kutpui an hman theuh theih nan khaw tina VC te chuan YMA nen tangrualin Duty Post siam theuh se a duh thu a sawi bawk.

Kangmei vanga chhiatna thulha thuneitute hnena zangnadawmna dawn theih nan a in report dan tur leh tul dangte Pi Esther Leihang, SDO Sadar hnen atangin ngaihthlak a ni a. Kangmei a lo chhuah chuan VLDMC te chuan DC office hnenah DDMA hmunpui anih na angin a rang thei ang berin an report tur a ni a. Chiat tawkte chuan an chhiat tawh dan milin form an fill up ang a, bank passbook phek hmasa ber xerox thil telin VC forwarding letter nen DC office-ah an theh lut ang a. DDMA lamin lo endikin felfai an tih chuan zangnadawmna pawisa a lo pe chhuak thei dawn a ni. Kangmei vanga chhiat tawh palha zangnadawmna dawn theih langsar zualte chu :-

1. Thuamhnaw kang - Rs. 2,500

2. Inchhung bungrua kang- Rs. 2,500

3. Lo kang - Rs. 18,000 per hectare ( Minimum Rs 2200 per farmer)

4. Ran vulh - Vawk tan Rs. 4,000; Ar tan Rs 100 per bird

5. In ( Kutcha House) - Rs 1,30,000 (fully damaged); Rs. 4,000 (partially damaged)

6. In (Hut) - Rs 8,000 per hut

7. Ran in - Rs. 3,000

Hemi anih rual hian dan phalloh thil tih vang emaw, tihluih vang emaw a kangmei tichhuakte chu zangnadawmna pek an nih dawn loh mai bakah dan anga hrem theih an ni.

Kangmei chhuah loh nana tihtur leh tihloh tur pawimawhte tarlan a ni a.

1. Eirawngbawlna gas off tur; a leak chuan hman luih loh tur.

2. Petrol/Diesel/Khawnvartui dahna fimkhur tur.

3. Mei mit lohva kalsan loh tur.

4. Electric wiring fel lo siamtir vat tur.

5. Electric hmanrua plug phawi thin tur.

6. Meizial bung tihlum lova paih loh tur.

Bawrhsap chuan VC te chu an khuaa kangmei leh chhiatna hrim hrim a thlen chuan a rang thei ang berin WhatsApp emaw a remchan dan dang emaw a inhrilhhriat vat a pawimawh thu a sawi a. Information rang taka pek chhuah hi chhiatna nasa zawk thlen theihna laka vengtu a ni tiin tanpuina pawh rang zawka pek chhuah anih theih nana thil pawimawh tak a ni a ti a. Kangmei laka Hnahthial District a lo him zawk theih nan kalkhawm zawng zawngte chu theihtawp chhuah tlang turin a sawm a ni.