Vawiin chawhnu khan Aizawl Press Club-ah kumtin an tih thin angin Mizo Writers Association (MWA) chuan inhmuhkhawmna hun an nei a. Art & Culture Minister Pu R. Lalzirliana chu Khuallian a ni.

Khuallian Pu R. Lalzirliana chuan Sap missionary kan rama an lo luh chinah ziak leh chhiar lamah nasa takin hma kan sawn a, thu leh hla lamah rahbi thar kan kai phah a ni tiin thu leh hla lama tui miten hla lungkuai tak tak an phuah te, hmanlaia kan pi leh puten hla an lo inhlanchhawn te ziaka dah a lo ni chho ta zel a ni, a ti a. Mi tam takin kan hmuh phak loh ramdang chanchin te, finna leh khawvel thiamna hmanga an siam chanchin ngaihnawm tak tak te kan tawnga lehlin a ni zel hi a lawmawm hle a ni, a ti a. Lehkhabu letling tur hian hun a duh rei a, a ziaktu rilru hrethiam chungin bengsika ngaihtuahna hman a ngai nasa a ni tiin thuziak hrang hrang lehlin kan neihte hian ngaihruat thiamna min pek bakah rilru a tizau a, mi tam tak ziak leh chhiar lama tuina petu a ni, a ti a. Literature hi mihring mizia leh rilru puthmangte min kawhhmuhtu, kan rilru sukthlek thlenga min kaihruai theitu a nih avang hian a pawimawh hle a ni, a ti a.  Hmasawnna lamtluang kan ramin a zawh zel lai hian kan mizo hnamzia leh zonunmawi kan chhawm nung zel hi a pawimawh hle a, thu leh hla kan lehlin chungchangah pawh kan fimkhur a tul a ni tiin kalkhawmte a chah a. Thalaiten social media lamah mizo tawng hman dan tur dik takin kan hmang lo nasa tawh a, tawng humhalhna kawngah hian hma kan lak a ngai tak zet a ni, a ti a. An kal zelna turah duhsakna a hlan a ni.

Mizo Writers Association hi kum 1977 khan din niin tun dinhmunah hian member 70 vel an awm mek a. Kumtin mizo subject-a titha tan Ch. Pasena Prize (HSLC), Lalmama Prize (HSSLC), R. Buchhawna Prize (B.A. Mizo Hons), J. Malsawma Prize (M.A. Mizo) an sem thin a ni.

MWA President Pu R. Lallianzuala chuan programme hi a kaihruai a. MWA Secretary Pu H. Ngurthansanga leh MWA Treasurer Pu T. Lalnunsiama atangin report ngaihthlak a ni a. MWA hian kum 2018 chhunga lehkhabu mizo tawnga lehlin tha ber atan ‘Ilibagizia Left to Hell-Pastor Murinzi’ ziak Pu Thankima lehlin an thlang a. Khuallian hian Translation Book Award 2018 hi a hlan nghal a ni.