2583/2025-2026

Dated Aizawl, the 9th December, 2025: Pu C. Lalsawivunga, Minister, Art & Culture Department chuan vawiin khan Department of History & Ethnography, Mizoram University buatsaih, ni thum chhung awh tur International Seminar on ‘Beyond Borders and Texts: Reframing the History and Polity of Highlanders in the Eastern Himalayan Borderlands’ chu MMTTC Lecture Hall, Mizoram University-ah khuallian niin a hawng.

Khuallian Pu C. Lalsawivunga chuan Mizo history zirchianna kawngah Mizoram sawrkar a inhawn thu leh kawng hrang hranga hma lak mek a nih thu sawiin, Mizote ngeiin Mizo history an zir chian a, an ziah ve a tul a tih thu a sawi a. Minister chuan archaelogy leh zirna peng dangte pawh Mizo history zirchian nana hman tul a tih thu leh a enkawl lai Art & Culture Department chuan hemi kawngah hma a la ve mek a, tun hnaia ruhro hmuhchhuah thar thenkhat chu a upat dan hre turin carbon dating tih a ni, a ti.

Minister chuan Mizoram sawrkar chuan Mizo history zirchian tul a tih avangin Art & Culture Department hnuaia Tribal Research Institute bultumin Mizo tobul chhui tura hma lak a ni a, zirna peng hrang hranga mithiamte he Mizo history chhuinaah hian teltir an ni, a ti a. He seminar hian hriatna a tihhausak belh mai bakah Eastern Himalaya ramri hrula tlangmite chanchin zirchianna dik zawk leh awmze ril zawk a hrinchhuah a beisei thu sawiin, seminar hi a hawng a ni.

Mizoram leh a chhehvela chengte history zirchianna chungchang seminar hawnnaah hian Prof. Vanlalchhawna, Finance Officer, Mizoram University chu khualzahawm niin thu a sawi a. Hawnna hun hi Prof Kishor Gaikwad, Head, Department of History & Ethnography-in kaihruaiin, kalkhawmte lawmna thu a sawi nghal a. Prof. K. Robin, Convener, Department of History & Ethnography chuan seminar sawihawnna a neih hnuah Prof. David C. Williams, School of Law, Indiana University chu thupui sawi hawngtu niin, North East India chungchang zirtu historian lar Prof. Sajal Nag, Department of History, Royal Global University, Guwahati pawhin thu a sawi a. Dr. Lalrinnunga Hmar, Department of History & Ethnography chuan lawmthu sawiin hun a khar a ni.

Seminar hian ni thum chhung - December ni 9 atanga ni 11, 2025 - a awh dawn a. Mithiam hrang hrangin thu sawiin paper an present dawn a ni. Hetih lai hian tunlai thlawhna cancel avanga buaina avangin Mizoram pawn atanga seminar-a lo tel turte chu an lo kal thei hlawm lo a, online-in thu an sawiin presentation an nei hlawm dawn a ni.