Nithum awh tur “Children's Film Festival 2020” chu vawiin chawhma dar 10:00 khan Vanapa Hall-ah Art & Culture Department Minister Pu R. Lalzirliana'n a hawng.

Naupang pual film Kutpui hawnna hunah hian khuallian Pu R. Lalzirliana chuan thusawiin, Media khawvela cheng kan nih tawh avangin naupang te pawhin an ban phak ang ang film an en ve vek tawh a, hei vang hian naupangte tana en tur tha, awmze nei leh zirtir nei tha film kan chhawpchhuahsak a tul tak zet tawh a ni a ti a. Hemi kawnga India ram pum huapa hmalatu, Children's Film Society of India (CFSI) ten Art & Culture Department, Mizoram te an rawn thawhpui duh chu lawmawm a tiin an phak tawka tha in an lo thawhpui zel theih tur thu CFSI hotute a hrilh bawk a ni.

Hun kaihruaitu Pu B. Lalthanliana, Secretary, Art & Culture Deptt. pawhin naupangte nun kaihruai nasa em em tu chu an film em hi a nih thin avangin an film en turah duhtui a ngaih thu leh Sawrkar pawhin theihtawp chhuaha he lam kawnga hma a lak zel tur thu a sawi bawk a ni.

He naupang pual Film Festival hi India ram hmun hrang hrangah buatsaih thin a nih thu leh Mizoramah ngei pawh I&PR department nen tangkawpin hetiang Festival hi CFSI te hian an lo buatsaih tawh thin thu he Kut hmanga lo kal Pu Dinesh Singh Negi, Distribution Officer, CFSI New Delhi chuan a sawi a. CFSI certified Film te en tam turin he Kut hmang tura lo kalkhawm naupang te chu a chah bawk a ni.

Ni 3 awh tur he Children's Film Festival 2020 hi vawiin leh naktuk hian Vanapa Hall, Aizawl-ah chawhma dar 10:00 atanga tlai dar 3:00 thleng naupangte entur liau liau a siam, zirtir nei tha tak tak film chhuah thin a ni dawn a. Naktip January ni 31, 2020 hian Graceland School, Khatla ah nilengin he festival hi chhunzawm a ni ang. Naupang te pualin ei leh in tur sem thin a ni dawn bawk a, a tam thei ang berin he festival hi chhim thin turin Department hotuten naupangte an sawm a ni.

Children's Film Festival 2020 hawnna hun hman zawh hian naupang te en turin Film tha tak tak chhuah chhunzawm a ni a. Neuhof School, New Horizon School of Education, Don Bosco School leh Upper Republic Model School naupang 500 vel zet in an en a ni.

Children's Film Festival 2020 hi Ministry of Information & Broadcasting, Government of India hnuaia Children's Film Society of India (CFSI) leh Art & Culture Department, Government of Mizoram te tangkawp buatsaih a ni.