Vawiin khan I&PR Minister Pu Lalruatkima chuan Aijal Club Park-ah Information and Public Relations (I&PR) Department buatsaih Mizoram Art and Photo Festival a hawng.

Pu Lalruatkima chuan lemziak lama tui mite, thlalak lama tui mite talent tarlang a, mipui hnena hmuh tir tura phochhuahna hun remchang buatsaih a ni chu lawmawm a ti a. Khawvel changkang zelah ram leilung leh hmunhma a inthlak danglam nasa a, thil thleng tawh te leh thleng mek te vawn that nan thlalak leh lemziak a pawimawh tiin heng lama thiamna bik nei ten an talent tipung a, tuipuiral thleng phak tura tan la leh zual turin a sawm a ni. Information Minister chuan I&PR Department kaltlangin sawrkar chuan chanchinbumite, lemziak thiam te, thla la thin te, film lama tui mite nena thawhhona tha tak a nei chho zel, a ti a. Sawrkar hmalaknaa press tour buatsaih te, art exhibition hrang hrang neih thin te, film festival te sawi langin Lianchhiari Run sak mekah art lama talent nei tha tak tak te tan inphochhuahna tur exhibition hall, theatre leh gallery te dah tum a nih thu a sawi bawk.

Art festival buatsaih hian rah tha chhuah se tiin Pu Lalruatkima chuan kan society-a a chhe lam kan sawi uar thin te, chhe ta vek leh sual ta hle anga inhmuh hi a fello tiin a chhe lam aia tha lam sawi uara infuih zawk tur kan nih thu a sawi a. Hmasawn zel tur leh inzir zel tur kan ni tiin beiseina thar nen hmalam hun thlir turin kalkhawm te a fuih a ni.

I&PR Director Pi Lallianpuii chuan art hi khawvela tawng (language) mawi ber a ni tiin lemziak, thlalak, milem ker leh tuk (sculpture) mawi tak tak te hian a hmutute thinlungah thu tam tak a sawi thin, a ti. Art hmang hian chhuan lo la awm zel turte hnenah ro hlu kan hnutchhiah thei tih sawiin Information Director chuan hetiang lama mi thiam te tang leh zual turin a fuih a. Mizorama hmun mawi kan neih te pholang a, pi pu sulhnu leh Mizo nunzia pholang thei tur thil tam tak te uar leh zuala pholang turin artiste te leh photographer te a fuih a ni.

Ni hnih awh tur he festival ah hian lemziak thiam mi 52 telin pencil/charcoal hmanga lem ziak 15, water colour 14, acrylic oil on canvas 44, a vaiin 73 an tar chhuak a, sculpture 6 an hung bawk a ni. Thlalak hi mi 28 te kutchhuak 165 zet pholan a ni bawk. Mizoram Art and Photo Festival hi a duh apiang tana tlawh theih niin thlalak leh lemziak te hi a duh tan lei theih a ni. Artist ten a hmunah thutchilhin an vil reng a, zawhna zawt duh tan pawh zawh theih reng a ni a. A hmunah hian painting demonstration te en tur a awm a, face painting leh mahni lem ziah tir te pawh a hmunah hian tih theih a ni.