3979/2022-2023

Aizawl the 24th March 2023 : Vawiin khan Pualreng Group YMA Inkhawmpui Vawi-37 na chu Bukpui Pavillion-ah neih a ni a, Art & Culture Minister Pu R.Lalzirliana chuan khuallian niin a hmanpui.

Khuallian chuan Mizoram ti ralmuang a ti nuam thintu, chhiatni thatni a tangkai em em YMA-te hnathawh leh inpekna chu fakawm tiin Pualreng Group YMA Inkhawmpui chuan khawtlang tan rah tha a chhuah ngei a beisei thu a sawi a. Mizo tawng uar thar zel a pawimawh thu tarlangin, hnamdang tawng mizo tawng a neih ang angte chu mizo tawng ngei a sawi leh hman thin a tul hle tih sawiin; Conference tih thin tuna ‘Inkhawmpui’ ti a hman uar tak a nih chu lawmawm a ti hle a ni. YMA chu khawtlang innghahna ber anih mek laiin YMA Member tam tak ruihhlo in a tihbuai nasat thu sawiin ,nasa zawk a tan lak thar angai a ni, a ti. Mizoram chu ruihhlo a sumdawnna ram lian tak tak pathum ‘Golden Triangle’ an tih zing a ram pakhat Myanmar nen ramri nei a nih avangin ruihhlo dona kawngah hian chintawk neih theih ani lo, a ti a, ram leh hnam hmelma lian ber ruihhlo do turin Kohhran leh NGO-te tanrual zel a tul a ni; a ti bawk. Khawtlang nuam leh chhenfakawm a nih theih nan kalkhawmte chu ruihhlo laka fihlim turin a sawm nghal bawk a ni. Ruihhlo bakah kuhva chu tawlhruk tam berte zing a mi ni a a hriat thu sawiin, Mizorama kuhva ching tuten dik taka an thawhrimna rah an seng theihna turin kuhva tawlhru thinte man kawngah, Police leh Excise--te kuta dah ngawt theih a ni lo a, sawrkar puih zawng a ke pen zel turin kalkhawmte chu a sawm bawk a ni.

Minister chuan hnamdang nupui pasal neih kawngah zirlai pawl MZP, MSU leh YMA-ten zirtirna an kalpui thin chu a fakawm hle ani a ti a, chutih rualin hmeichhiate khuahkhirh ringawt chu dik famkim tawk lova a hriat thu sawiin; mipate pawh in enfiah a ngai tih a tarlang a, Mizo hmeichhiate tan pasal a neih tlak ni turin, ruihhlo a fihlim, ei leh bar zawn kawngah hmeichhiate rintlak ni tura tan lak thar a ngai a ni, a ti. Khawvelin hmeichhiate dinhmun chawisang tura ke a pen laiin, Mizote hnungtawlh zawnga kal a rem lo a, hmalam pan a hmeichhiate dinhmun chawisang tura ke pen turin YMA-te chu a sawm bawk a ni. Zoram nuam siam tura kalkhawmte chu sawmin Pu R.Lalzirliana chuan ramngaw leh nungchate humhalh kawngah than harh a ngai a ti a, Mizoram ; ngaw tha tak, ramsa leh sava tamna hmun ni thin chu hmuh tur an tlem tawh hle a, ramngaw a chereu zo ta chu a chhunga chengte zir loh vang ani tiin ram nuam tak nungchate len-na ram a siam leh turin Zoram mipuite a sawm nghal bawk.

Khuallian chuan Covid-19 hripuiin nasa tak a Mizoram a tihbuai lai leh thenawm State nen a ramri ah harsatna lian tak a tawh lai pawhin sawrkar hmalakna zarah ei leh bar, tuialhthei leh gas-ah Mizoram a hnianghnar hle chu sawrkar leh mipuite thawhhona rah a ni a ti a. Zoram mipuiten an vei thin tak, Assam Rifles-te pawh an in sawn chhuak dawn ta niin a sawi bawk.

Vawiin programme hi Pu R. Vanlaltlana ,Secretary, Pualreng Group YMA chuan a kaihruai a, Pu K.Lalthianghlima, VCP Bukpui in lawmthu sawina neiin hun a khar a ni.

Pu R Lalzirliana Power & Electricity Minister ni bawk chuan 33KV Sub-station Bukpui leh Sentlang Sub-station te a tlawh nghal a. Hnathawktuten an harsatna hrang hrang Minister an lo sawipui te chu sukiang thuai tura hmalak vat a nih tur thu in a lo chhang  hlawm ani.