3728/20232-2024

Aizawl, the 8th February, 2024: Pachhunga University College (PUC) hnuaia department pali - English, Mizo, Philosophy leh Education department-te tangkawp chuan vawiin atang khan Social Media-in hnam nunphung a nghawng dan zir chianna, ni hnih chhung awh tur 'International Seminar on Social Media and Tribal Culture : Impact and Intersections' tih chu an buatsaih a. He hun PUC Seminar Hall-a hman hi Art & Culture Minister, Pu C. Lalsawivunga chuan khuallian niin a hmanpui.

Seminar hawnna pual inkhawmah Khuallian Art & Culture Minister Pu C. Lalsawivunga chuan nitin nunphungah social media platform hrang hrangte'n bu a khuar thuk thu leh tangkai taka hman a nih theih dante tarlangin, University leh College pawhin zirna tha zawk kalpuina atan an hmang tangkai hle a ni, a ti a. Kalkhawmte chu khawvel changkang zelah social media chu tribal culture vawnhim kawnga tangkai taka hman thiam tum tur leh nghawng tha lo a neih loh nana theihtawp chhuah turin a fuih a. PUC chu Mizoram mai ni lo India ram pum ang pawha College tha zinga a tel pha chu chhuanawm a tih thu sawiin, hetiang a nih theihna atan hian zirtirtute leh zirlaite tanrualna mai bakah social media hrang hrang, a bikin youtube chu zirna leh zohnahthlak culture chawilar nan tangkai taka an hman thiam vang a ni a, Chhawkhlei Cultural Club siam music video pawhin entu thahnem tak a nei a ni, a ti a. Khuallian chuan social media chak tak hmang hian Global culture-ah kan hnam nihna phochhuak a, a tha lam zawnga kan hnam nun kan chawikan zel hi a ngai a ni, a ti bawk.

Pu C. Lalsawivunga chuan Mizoram chhunga zirna in hrang hrangah National leh International huap seminar changtlung tak tak neih a ni thin chu lawmawm a tih thu sawiin, zirna chuan tawp chin a nei lova inzir belh zel ngai kan nih avangin seminar, workshop leh conference-te kaltlanga hriatna kan inhlan chhawng zel thin hi a hlu hle a ni, a ti a. Thangtharte vanneihna chu zirtirna pangngai mai bakah tunlai thiamna hmangin khawvel hmun dang dang atanga mithiam tak takte hnen atangin zirtirna an ngaithla thei hi a ni, a ti a. Social media-in tribal culture leh khawtlang nunphunga nghawng a neih dante zirchian a pawimawhzia hriaa PUC in seminar a buatsaih chu lawmawm tiin a ngaihhlut thu a sawi a; seminar hlawhtling leh a chhimtute tana hlawkthlak tak hman a nih theih nan duhsakna a hlan a ni.

Seminar hawnna hun hi Dr. Henry Lalmawizuala, Convener & Head, Department of English, PUC chuan kaihruaiin Prof. H. Lalthanzara, Principal, PUC in kalkhawmte lawmna thu a sawi a. Prof. Margaret L Pachuau, Head, Department of English & Culture Studies, MZU in seminar thupui a sawifiah a. Dr. Lalrintluangi, Co-Convener & Associate Professor, Department of Education, PUC in seminar buatsaih dan chungchang report a pe a ni.

He international seminar-ah hian mithiam hrang hrang - Oxford University, UK atangte, Mauritius atangte, Mumbai leh India ram hmun hrang hrang bakah Mizoram chhunga mithiam tak tak 36 te paper buatsaih chu zirho a ni dawn a ni.

Pachhunga University College hnuaia school hrang hrang chuan kumin chhung hian International seminar/conference 6 an buatsaih dawn a; tun tuma mi hi a pahnihna niin seminar hi naktukah chhunzawm leh a ni ang.

Pachhunga University College hi kum 1958 a din niin, A+ Accreditation (CGPA- 3.47) nei mekin NIRF ranking 2023 ah India ram college tha zingah 34-na a hauh pha a ni. Ram hectare 122 a zau campus neiin, Undergraduate (UG) zirna department 23, Post Graduate (PG) zirna 5 leh Ph.D zirna 2 an kalpui mek a. Tun dinhmunah zirlai 3,000 vel awm mekin heng zingah hian State dang atanga pantu zirlai 42, ram pawn atanga pantu zirlai 3 bakah Ph.D Scholar 60 an nei mek a. Zirtirtu 118 leh staff 80 an awm mek bawk.