Archive Hall, Babutlangah vawiin khan Art &Culture Minister Pu P.C. Zoram Sangliana chuan "Women and Culture" tih thupui hmanga Art &Culture Department leh Association of Theologically Trained Women of India (ATTWI), Mizoram Branch te seminar buatsaih a hawng.

Pu PC Zoram Sangliana chuan hmeichhiate leh hnam nun chungchang chu Mizo hnam mamawh, buaipui tham leh ngaihtuah tham a ni a, palzut leh ngaihthah mai mai chi a ni lo, a ti a. Hnam nun chhawm nun nachang hrelo leh hlamchhiah reng reng an ding chhuak ngai lo a, hmasawnna leh tunlai nunin kan khawsak phung a khawih danglam mek lai hian pi leh pute atanga kan chin than hnam nun mawi leh tha lai te chhawm nung a, a chhe lai te erawh paih ngam hi kan tih tur a ni, a ti a. Hnam nun humhalh chhuanlama hmeichhiate nun nek chep zawnga khawsa hnam thenkhat an awm a, heng mite atang hian in zira, hmeichhiate dikna leh chanvo hum halh kan tum zawk tur a ni, a ti. Minister chuan hmeichhiate pawimawhna leh hlutna te, an chanvo leh dinhmun luah te, duhsakna an dawn leh dawn lohte, hamthatna an dawn leh dawn loh te thlengin he seminar hmangtute hian zirchhuak thei se a duhsak thu a sawi a. Mizo Customary Law hman lai meka hmeichhiate dinhmun te zir chiangin he Seminar kal tlanga Mizo hnam nun her rem tulna laite hriatchhuah a nih phei chuan Mizo hnam tan thil hlu kan pawchhuak dawn tihna a ni, a ti.

Art &Culture Secretary leh Director ni bawk Pi B. Sairengpuii kaihhruai he seminar-ah hian ATC Lecturer Dr. Lalrindiki Ralte buatsaih "Hnam Nun (Culture) in mihring a kaihhruai dan", Hrangbana College Lecturer Pu B. Lalthangliana buatsaih "Kristianna leh Mizo hnam nun" leh ATC Lecturer  Dr. T. Vanlaltlani buatsaih "Hnam tana hmeichhiate hlutna leh pawimawhna" zirhona hun an hmang a. Chawhnu lamah ATTWI President Pi P. Lianngengi kaihhruaiin sawihona hun an hmang zui nghal a ni.