Vawiin khan Art & Culture Minister Pu R.Romawia chuan State Central Library Extension Building, New Secretariat Complex ah a hawng.

Minister Pu R.Romawia chuan State Central Library Extension building hawn theiha a awm chu lawmawm a ti a, Specially-abled room an siam tel chu tha a tih thu sawiin, building dangah te pawh tar chaklote leh rualbanlote tan veivahna awlsam zawk ruahman sak a tul thu a sawi a. Library chu finna tamtak inphumna hmun anih angin mi tam zawkten finna an haichhuah theih nan a hmang tangkai turin a chah bawk.

State Central Library Extension Building sak hna hi TBL Architectural Consultants ten April 2016 khan thawk tanin, August 2017 khan an sa zo a. Library Extension building hi  sq.ft 3937 a zau niin, internet centre, Audio-visual room, Specially-abled room, Reference Area, Stack area leh Reading room te siam a ni a. A senso hi National Mission on Libraries, Ministry of Culture, Govt. of India (90%) leh Mizoram sawrkar (10%) intum sem atanga sak niin, extension building sak nan hian cheng nuai 100 hmanral a ni.

State Central library extension building hawnna inkhawm hi Pu. R.Hmingthanzuala, Director Art & Culture department in a kaihruaia, technical report te ngaihthlak niin Pu. Lalramliana, State Librarian chuan lawmthu sawina hun a hmang bawk. Art & Culture Department hnuaiah hian library 488 awmin, member kum 14 hnuailam 982 leh puitling 5394 an awm a, lehkhabu 64459 a awm bawk a ni.