Pu R. Romawia, Art & Culture Minister chuan nimin khan Hliappuiah Suakphunga Heritage Centre a hawng.

He centre hi Art & Culture hnuaia 13th Finance Commission Award atanga sak ni in a building pumpui hi 456.15 sqm a zau a ni. He centre hian chhawng hnih a nei a, a chhawng hnuai zawkah Multipurpose hall, Rural Museum, Rural Library, Dining hall leh choka a awm a, a chhawng chung zawkah hian mikhual thlenna room pathum dah a ni bawk. .

Minister Pu R.Romawia chuan khawtlang inkaihhruaina fel a tihzia sawiin khaw tamtakin ramngaw an thiah nasat viau laia Hliappui khua chuan rawmngaw tha tak an la nei thei leh an humhalh that avangin lawmawm a ti a. Khawtlang inlungrual tak an nih avangin he centre enkawlzuina ah leh a chhawrzui naah an tanrual a beisei thu a sawi.

Minister chuan Art & Culture department a hnathawktu te leh YMA leh MUP ten Mizo culture an vawngnung reng chu lawmawm tiin Kohhran leh YMA ten Mizo hnam an thuikhawm tlat hi chhawm nun zel a pawimawh a ni, a ti a. YMA te pawh hian hnam inpumkhatna kalpui a tum viau laiin hmun hrang hrang ah hnam bil puala pawl hrang hrang ding thinte chu tha a tih loh thu a sawi a, Zohnahthlakte min huikhawm tur chuan Art & Culture department dinhmun hi a pawimawh takzet a ni, a ti. Kan mizo pipute hmun hlui zawng zawng hi Art & Culture Deptt. chuan a humhalh zel dawn tiin he hna an thawhnaah hian  tawiawm turin Zoram mipuite a sawm bawk a ni.

Centre hawnna inkhawm hi Hliappui Community Hall ah hman a ni a, Art & Culture Director Pu R. Hmingthanzuala bakah Dy. Director Pu K. Lalruala leh Official dangten an hman pui. Hawnna inkhawm hi Pu Lalthaliana VCP Hliappui in a kaihruai a ni.