Vawiin khan United Nations Security Council Resolution 1325 chungchang zirhona international workshop chu Dean Conference Hall, School of Social Sciences, MZU ah neih a ni a. Law Minister Pu Lalsawta chu khuallian a ni.

Pu Lalsawta chuan khawvel hmun hrang hrangah leh India ram chhung ngei ah pawh hmeichhiate chunga hleilenna a thleng fo va, indona hmunah phei chuan pawisawilo hmeichhia leh naupangin kut an tuar nasa hle thin. Hei hi hriain United Nations Security Council chuan hmeichhiate himna turin Resolution 1325 hi a siam ta a ni, a ti a. India ram erawh chuan he Resolution hi a la hmang ve rih lo va, he workshop atang hian UNSCR 1325 pawimawhna leh hman a tul dan te zir chhuak a, ngaithla liam mai lovin mahni theihna zawn theuhvah a tihlawhtlingtu nih tum turin kalkhawmte a chah a ni.

UNSCR 1325 hi October 31, 2000 khan United Nations Security Council chuan a pawm a. He resolution hian indona leh innghirnghona a thlenna hmuna hmeichhiate dinhmun leh tawrhna hriain an himna tur a ngaihtuahsak a. Indona leh inkahna a thlen laia hmeichhiate dikna chanvo humhalh tlat turte, remna thu an sawi lai pawha hmeichhiate telh ve ngei tur leh remna an siam hnu pawha hmeichhiate chunga harsatna a thlen zui lohnana humhim zel turin United Nations Security Council chuan Resolution 1325 hi a siam a ni. He resolution hi United Nations in resolution a siam zinga a bik taka hmeichhiate a lamchhuah hmasakna ber a ni.

Prof. Lalneihzovi kaihhruai Workshop hi nilenga neih niin speaker hrang hrang New Delhi-a Arms Control Foundation of India dinchhuaktute zinga mi Ms.Binalakshmi Nepram, Manipur Gun Survivor Network atangin Ms.Omita, MZU Dept.of Pol. Sc. atangin Prof.J.K.Patnaik leh MZU Dept. of Public Administration atangin Prof.Lalrintluangate’n thu an sawi a. Department of Social Sciences, MZU a Dean ni mek Prof.Srinibas Pathi chuan workshop thlirlawkna hun hmangin UNSCR 1325 pawimawhna leh awmziate a sawifiah a ni.