Damlo enkawlna tihchangtlun nana Kulikawn Hospital ah Emergency Services leh Dental OPD siam thar te chu vawiin chawhma dar 10:30 khan Health Minister Pu Lal Thanzara’n a hawng.
Hawnna inkhawm, P.M.O. Conference Hall, Health Worker Training Institute-a neih ah Minister chuan mipui hriselna enkawlna kawnga Health Department hmalakna hrang hrang tlangpui te sawiin Department-in hma a sawn zel chu lawmawm a tih thu a tarlang a, thawktute inpekna leh thawhrimna ah lawmthu a sawi bawk. Department hmasawnna chuan midangte tan malsawmna a thlen zel dawn a ni tiin dam chhung reilote-a midangte tana inpe chhunzawm zel turin Health Department thawktute chu a chah bawk. Health Department hnathawh chu mitin mamawh a nih thu sawiin mipui mamawh zawng zawng erawh an phuhruk theih loh thu a tarlang a, khaw tam takah pawh thawktu indaihlohna a nasa hle a ni, a ti. Doctor transfer chungchang sawiin Minister chuan Aizawl ah mamawhna a san zawk avangin Specialist Doctor pakhat Serchhip atanga transfer chu Serchhip tlawmngai pawl ten an hriatthiam loh chu Minister chuan pawi tiin Sawrkar tan pawh hmalak dan thiam a har thu a sawi lang a. Serchhip ah an mamawh zawk Specialist dang pek tum a nih thu sawiin Serchhip khaw mipui te chu Department hmalakna hriatthiampui turin a ngen a ni. Health Department hmanrua tlakchham leh mamawh te pawh a remchan anga ngaihtuah chhoh zel tur a nih thu te sawiin Pu Lal Thanzara chuan Department thawktute chu fimkhur tak leh thahnemngai taka thawk chhunzawm zel turin a chah bawk a ni.
Kulikawn bialtu AMC Ward XIX Councillor Pu Ramhlunsanga pawhin thusawiin mipui mamawh phuhruk nana Kulikawn Hospital siam changtlun chhoh zel a ni chu lawmawm a tih thu a sawi a, thawktu fel tak tak te inpekna ah lawmthu sawiin mipui rawngbawl hna thawk chho zel turin Department thawktute chu thawhpuiah a sawm bawk.
Kulikawn Hospital ah hian Deputy Medical Superintendent hovin Doctor 28, Nurse 19, Group D 29 leh thawktu dangte nen an zavaiin thawktu 91 an awm a, khum 50 awmin Psychiatry, Gyneacology, Paediatric, Dental, General leh mit entirna te a awm a ni. Dental OPD Room tha tak siam thar a ni a, Emergency Services hawn thar ah hian Doctor leh Nurse te chhun zan zawmin an duty tawh dawn a, damlo te harsatna tam tak a sutkian ngei beisei a ni.
Vawiin Emergency Services leh Dental OPD hawnna inkhawm hi Deputy Medical Superintendent Dr Lalhmuchuaka’n a kaihruai a, Health Department Principal Director Dr K.Ropari, Health Services Director Dr Rohmingthanga Ralte, Health & Medical Education Director Dr Lalbiakkima, Aizawl Civil Hospital Medical Superintendent Dr Rosangluaia leh hotu dangte bakah khawtlang hruaitute an tel a ni.
