2051/2025-2026

Dated Aizawl, the 25th October, 2025: Pu C. Lalsawivunga, Art & Culture Minister chuan vawiin khan Art & Culture Department buatsaih Live Museum hawnna chu Mizo Typical Village, Zokhua, Falkawnah khuallian niin a hmanpui a. Zokhua, Falkawn kawtchhuaha Sekawtrawlhah kawi hrui sat chatin a hawng a ni.

Khuallian Pu C. Lalsawivunga chuan thu sawiin, Live Museum buatsaih a ni chu a hlu a tih thu leh thangtharte’n pipute khawsak dan leh nunphung an hriat thar nan te, tualchhung mite leh thalaite tana sum lakluhna hnar atan te, zinmite’n Mizo kutchhuak an hmuha an lei theih nan leh Mizo nihna leh hnam zia an zir theih nan a pawimawh thu a sawi a. Ei leh in pawh Mizo taka buatsaih a nih a, Live Museum chu tihchangtlun a nih chhoh zel a beisei thu a sawi a ni.

Live Museum hawnna hun hi Pi Zodingpuii, Secretary, Art & Culture Department chuan a kaihruai a. Pu Sudhir Kumar, Principal Secretary, GAD, EF&CC, Pu Seju P. Kuruvilla, Inspector-General of Police, leh Pu Rajeev Kumar Tiwari, Principal Chief Conservator of Forests-te pawh an tel a. Falkawn khuaa NGO hrang hrang - YMA, MHIP, MUP atanga thlan chhuahte leh Lenkawl Cultural Club-te’n hmanlai Mizo khaw nundan an entir a ni.

Live Museum Show hi a bul tan nan kartin Inrinni apianga neih tura ruahman a ni a. Art & Culture Department chuan heng ni – October ni 25, November ni 1, ni 8 leh ni 15, 2025-ahte hian Live Museum buatsaih phawt a tum a, a tul dan azira buatsaih chhunzawm zel tur a ni. Mizoram State pawn atanga khualzin lo lut an pun belh zel avang te, tualchhung mipuite Local Tourism-ah kan harh thar zel avangtein chu’ng mite en tur leh chhim theih tur chuan Mizo Culture leh Tradition chawilar zel nan Live Museum hi buatsaih a ni.

Thangthar leh naupang zawkte’n Mizo nunze mawi leh chin dan hrang hrangte a tak ngeia an hmuh leh tem chhin theih nan te, zirlai naupangte tana tangkai tur leh an zirlaibua awmte an hriatthiam lehzual theih nan leh khualzinte’n kan hnam nun an hmuhfiah theihna tura buatsaih Live Museum hi Inrinni apiangin Entry Fee Rs. 100/- chawiin a chhim theih dawn a; show hi hun hnihah then niin, First Segment chu 12:00 Noon - 01:30 PM-ah neih a ni ang a, Second Segment chu 02:00 PM - 03:30 PM-ah neih a ni ang. Mizo nun dan chi hrang hrang, he’ng - Live Demonstration of Mizo Village Life, Traditional Dance, Folk Song & Dance, Indigenous Games, Traditional Cuisines, Traditional Costumes te entir thin a ni dawn a ni.