NEZCC bultuma Art & Culture Department leh MZP Gen Hqrs. tangkawpa buatsaih nimina Vanapa Hall-a tan tawh ZOFEST 2009 chu vawiin khan neih chhunzawm a ni a. ZOFEST 2009 ni 2-na hi Art & Culture Minister Pu P.C. Zoram Sangliana’n a hmanpui a, ZOFEST 2009 Souvenir a tlangzarh nghal a ni.

 

 

 

Khuallian Pu P.C.Zoram Sangliana chuan ‘Insuihkhawm Zai I Rel Ang U’ tih thupui hmanga ZOFEST 2009 chhim tura state chhung leh pawn atanga lo kal khawm zawng zawngte chibai a buk a, state leh state inkara ramri piah lama Mizo hnahthlak zawng zawngte chu inpumkhatna thinlung kan pu hi a ropui a ni, a ti. MZP ten Zo hnahthlak hnam hrang hrang inpumkhatna tura hnamzia leh zai leh lam hmanga ZOFEST tum 4 lai an buatsaih thei chu lawmawm a tih thu sawiin Minister chuan Mizo ram leh hnamin a mamawh apiangin MZP chu a penchhuak thin a, an rahchhuak thin a ni, a ti. Hnam culture mawi leh ropui tak nei mahila, remna leh muanna a awm si loh chuan awmzia a nei thei  lova; Mizoram rambuai laia sorkar, kohhran leh tlawmngai pawl bakah zirlaiten theihtawp an chhuah avangin Mizoramah remna leh muanna boruak a thleng leh thei a ni, a ti. Mizo hnamzia leh nunphung mawi tak te chu khawvel hriata phochhuah a tulzia sawiin Minister chuan Mizo history leh thawnthu te chu tawng hrang hranga lehlin a tul a ni, a ti a. Nakum Chapchar Kutah Cheraw World Record siam tumin tunah hian cheraw lam tur bu 10,000 an inbuatsaih mek thu a sawilang bawk. Hnamdang laka chimral kan hlauh rual hian kan hnam himna chu kan kutah a awm a ni tih i hre reng ang u tiin kalkhawm zawng zawngte a chah a ni.

MZP Gen. Hqrs. President Pu C. Lalhmachhuana pawhin thuhma sawiin ZOFEST tum 4 an hmang thei chu lawmawm a, NEZCC-in cheng nuai 4 an pek bakah Mizoram state sorkarin theih ang angin sum leh tha ui lova ZOFEST 2009 hlawhtlinna nan an inpekna chungah lawmthu a sawi bawk.

Vawiin ZOFEST-ah state thenawm atanga Zo hnahthlak cultural troupe hrang hrang lo kal te chu zai leh lam hmuhnawm tak tak an entir bakah he hun chhimtute atangin ZOFEST an hmuhdan leh rawtna siam duhte tan hun an hawng bawk a ni.  ZOFEST 2009 kharna inkhawm hi zanin dar 6:30, Vanapa Hall-ah hman a ni dawn a, a duh apiang tel turin MZP leh Art & Culture Dept. te chuan an sawm a ni.