5/2025-2026 

Aizawl, the 1^st April 2025 : Vawiin khan Art & Culture Minister Pu C. Lalsawivunga hovin a Office Chamber MINECO ah United Nations Educational Scientific & Cultural Organization (UNESCO) in khawvel huapa art hmasawnna atana a thawpui pawl Association Internationale des Arts Plastiques/International Association of Art (AIAP/IAA) hnuaia India-a he pawl hruaitute India a UNESCO World Art Day April ni 15 lawmna atan Mizoram chu Official Host atana an lo thlan chungchanga, he ni lawmna atan inbuatsaihna leh hmalak dan tur ruahmannate an sawiho a ni.

Art & Culture Minister Pu C. Lalsawivunga chuan UNESCO thawhpui pawl IAP in India pum huapa World Art Day lawmna atana Mizoram an thlang chu lawmawm tiin hlawhtling taka he hun hi hman  ani theih nana IAP-in Department pali lai thawhpuia an sawm chuan hian he programme pawimawhzia a tilang a ni, a ti a. He hun hi Mizoram leh Mizote chanchin khawvel huapa pholanna hun remchanga a ni thei dawn tiin kan culture hi hmun hrang hrangah kan pholan a tul a, nikuma Turkey rama Cheraw kan tur kan hruaite an hlut zia ka hmuh khan midangin kan culture an hriatchak chak zia ka hmu a, World Art Day lawmna hi kan culture pholanna lamah a tangkai thei dawn niin ka hria, a ti bawk.

Meeting ah World Art Day lawmna atana Mizorama IAA hruaitute  Department pali – Art & Culture, Tourism, Information, Public Relations, Printing & Stationery leh Commerce & Industries Department te thawhpui an tum dan chu chipchhiar takin an sawi hawng a. Hemi hnu hian heng Department pali hotulu te chuan a mal malin an ngaihdan te sawiin thawhhona kawng hrang hrang leh Department atanga tanpui an beisei dante chu an sawikhawm leh a, hma lak zel dan tur te pawh an rel bawk a ni.

Tarlan tawh angin February ni 7, 2025 khan IAA Mizoram Chapter leh IAA India President Pu Manaj Saha te chuan hemi chungchang hi Chief Minister Pu Lalduhoma an lo sawipui tawh a ni.