1233/2024-2025

2024 Vawkhniahzawn thla ni 19: Vawiin khan Lunglei Sazaikawna District Museum Lunglei sak thar chu Mizoram sawrkara Art & Culture Minister Pu C. Lalsawivunga'n a duh apiang tlawh theih turin a hawng.

District Museum Lunglei hawnnaah hian Mizo Cultural Artistes' Association (MCAA), Lunglei Sub-Headquarters te'n cheraw an kan a. Art & Culture Minister Pu C. Lalsawivunga chuan Museum banga a hawnna lungphun khuhna puanzar a pawh hawn hnuah ribbon chep chatin, Museum chhung chu a fang kual nghal a. Museum a fan zawh hian Museum Exhibition Hall-ah Museum hawn puala inkhawm buatsaih chhunzawm a ni.

Art & Culture Minister Pu C. Lalsawivunga chuan District Museum Lunglei hawng theia a awm chu lawmawm a tih thu sawiin, Pathian hnenah leh a satute chungah lawm thu a sawi a. Lungleia District Museum changtlung leh chhenfakawm tak a awm theih nana sulsutu hruaitu hmasate chu zahawm leh chhuanawm a tih thu sawiin, an chungah lawm thu a sawi bawk a. District Museum Lunglei hawn theiha tihpuitlin a nihna kawnga Art & Culture Department-a a thawhpuite inpekna leh thawhrimna a fak bawk.

Art & Culture Minister chuan Art & Culture Department chu miin zai leh lam tleng tleng department ang te, pi pute tih dan ṭha vawng hima chawi nungtu ang te'n an hre ṭhin tih sawiin, mipui nawlpuiin an hriatpui em em loh, state danga department puitling an neihna ṭhin - tribal research, museum, library, archaeology, music & fine arts peng hrang hrang tea an hma lakna chu a namai lovin, a pawimawh hlawm hle tih a sawi a. He'ng Art & Culture hnuaia peng hrang hrangte hian anmahni zawn ṭheuhvah theih tawpin hma an la a, Mizoram leh mipuiin a zar pawh kan la zo zel dawn a ni, a ti a. Art & culture hnuaiah pi pute chanchin uluk zawka zir chian leh lehkhabua buatsaih a nih thu te, pi pute sulhnu hai chhuak tura hma lak reng a nih thu te, library kal tlanga mipuiin thiamna leh finna an chhar chhuahna tur lehkhabu lak khawm leh chhawp chhuah kalpui a nih thu te sawiin, museum kal tlanga pi pute sulhnu leh thil hlu tak tak mita hmuh leh en theih mai tura chhawp chhuah a ni te chu a hlu hle a ni, a ti a. Museum-a thil vawn ṭhat tur ngaihven chu sawrkar department kut chauh ni lovin, mipuite mawhphurhna a ni tel tih sawiin, mipuite chu ṭhahnem ngai taka thawk tlang turin a sawm a ni. 

Minister chuan mahni hnam ziarang leh nunphung rochun tur Pathian min pek kalsan leh mausam hnam an dingchang ngai lo tih sawiin, pi pute aṭanga kan rochun nun ze mawi leh hnam ziarangte vawn him leh chawi nun zel chu ram leh hnam hmasawnna leh din chhuah nana ṭhangtharte bat leh tih tur a nih thu a sawi a. Hman lai nunphung pho lang leh tar lang theitu hmuh leh khawih theih thil museum-a chhawp chhuahte chuan hnam ziarang vawn nun kawngah hma min sawntir a beisei thu sawiin, khawih theih loh Zo nun ze mawi leh hnam rohlute pawh vawng nung zel turin mipuite chu a chah a ni.

District Museum Lunglei hawnna inkhawm hi Art & Culture Department Secretary Pi Florence Zotluangpuii chuan kaihruaiin, inlawmna thu a sawi a. Lunglei Sub-Headquarters YMA Zaipawl te'n hawnna hla sain, BCM Rahsiveng bialtu pastor Rev. T. Lalsangvunga'n hunserh a hmang a. Art & Culture Department Deputy Director Pu F. Lalthanmawia'n report pein, Art & Culture Department Director Pi Carol VLMS Dawngkimi'n lawm thu sawiin hun a khar a ni.

District Museum Lunglei hawnna hunah hian Lunglei West Bialtu MLA Pu T. Lalhlimpuia leh Lunglei Municipal Council (LMC) Chairman Pu Lalzuithanga leh Councillor-te bakah, Art & Culture Department hotute leh Lungleia sawrkar office hrang hrang hotute, local council leh political party hruaitute, YMA, MHIP, MUP, MJA, AIR, MCAA leh MCO ai awhte leh sawm bik mi pawimawhte an tel a ni.

District Museum Lunglei hi Ministry of Culture, Government of India aṭanga sum hmuh ₹ 9,19,13,000/- (cheng vaibelchhe kua maktaduai khat nuai kua sing khat leh sang thum) senga sak niin, a sak hna hi M/s Okahito Consultancy Services, Khatla, Aizawl te'n an thawk a. October ni 24, 2020-ah hna ṭanin, March ni 8, 2024 khan sak zawh a ni.

District Museum Lunglei hmunhma zau zawng hi square metre 25,273 a ni a. A building hi square metre 1,160-a zau, metre 10.8-a sang niin, chhawng thum a awm a. Basement square metre 270-a zauvah hian reserve collection room, fumigation room, laboratory, office, workshop, etc. awmin, ground floor square metre 890-a zauvah lobby/reception counter, souvenir shop, ticket counter, library cum cafeteria leh museum gallery hrang hrang (photography, history, textile & general), etc. a awm a. 1st floor square metre 500-a zauvah gallery hrang hrang (anthropological, ethnological & art) leh Multipurpose Hall awmin, a chungah square metre 310-a zau open air theatre a awm bawk a. Facility dang - lirthei hunna, ramp, cctv camera 57, generator 45kVA, lift (8 passenger), security metal detector, fire alarm system & smoke detector te awmin, Museum chhung room hrang hrangah AC vuah a ni bawk.

District Museum Lunglei hi a duh apiang tan tlawh theihin a awm nghal a. Luh man (ticket) hi puitling tan ₹ 20/- leh naupang tan ₹ 10/- a ni dawn a. A thar lawmna atan Art & Culture Minister Pu C. Lalsawivunga chuan District Museum Lunglei hi July ni 22 & 23, 2024 (Thawhṭanni leh Thawhlehni)-ah te khian mipuite tan luh man chawi ngai lovin, a thlawna en theih a ni tih a puang a ni.