1232/2023-2024

2024 Vawkhniahzawn thla ni 19: Vawiin khan Lunglei District Pentecostal Youth Department, UPC (NEI) leh District Health Society, Lunglei District te ṭang kawp huaihawtin District Conference Hall, Chanmari-ah ruihhlo ṭhat lohzia inzirtirna (drug awareness) leh natna inkai chhawn theih loh Non-Communicable Disease (NCD) chungchang inzirtirna hun buatsaih a ni.

He hun hi session hniha ṭhen niin, session khatna hun hi Evan R. Lalsanglura, Finance Secretary, Lunglei District PYD chuan a kaihruai a. Rev. C. Lalrintluanga, Superintendent, Lunglei District UPC (NEI) chuan hunserh hmangin, NCD Sub-Committee Chairman, Lunglei Additional Deputy Commissioner Pu James Miahlung chuan thuhma a sawi a. PYD te'n NCD leh drug awareness hun ṭha tak an siamsak avangin lawm thu sawiin, June ni 12, 2024 khan Health Minister Pi Lalrinpuii'n Healthy Lunglei District  Campaign chu a hawn thu leh hemi hnuaiah hian natna inkai chhawn theih loh NCD-a Lunglei District ṭhalaite an him zawk nana zirtirna bakah, an hriselna te endik ṭhin a nih thu a sawi a. NCD avang hian mi tam takin nunna an chan tih sawiin, chu vang chuan he natna hi zavaia ṭang ruala do a ngaih thu leh inven a pawimawh thu a sawi a. PYD te chu vaihlo kaihhnawiha fihlim tur te, zuk leh hmuam ti lo tur leh naupang zawkte zirtirna pe chhawng ṭhin tur te'n a chah a ni.

Dr Lalrinthangi, Deputy Chief Medical Officer, Lunglei pawhin thu sawiin, programme hrang hrang an hman ṭhinah PYD te ṭawiawmna ṭha tak an dawn ṭhin avangin lawm thu a sawi a. Lungleiah ruihhlo a hluarin, a ti ṭhin pawh an tam a, HIV positive pawh an tam tih sawiin, hei vang hian ṭhalaite zingah ruihhlo leh hri hlauhawm chungchang zirtirna pek bakah, a do kawnga hma lak nasat a ṭul thu a sawi a. Kohhran ṭhalaite chu thawh hona ṭha tak nena hma lakpuiah sawmin, kum 30 chung lamte chu mahni veng Health & Wellness Centre te hmang ṭangkaia an hriselna dinhmun enfiah ṭhin turin a chah bawk.

Drug awareness leh NCD campaign-ah hian Dr VL Hrechianga, Medical Officer, Hrangchalkawn UPHC chu resource person niin, NCD vei theih dan leh inven dan bakah, tih tur leh tih loh turte sawiin zirtirna a pe a ni.

Session hnihna hi Evan Laldinpuia Sailo, Treasurer, Lunglei District PYD chuan a kaihruai a. R. Lalropuii, Counsellor, Grace Society chu resource person niin, ruihhlo ṭhat lohzia zir ho a ni.

He awareness campaign-ah hian PYD ṭhalai 50 vel  an tel a. Lunglei Civil Hospital-a thawktute'n an hriselna an endiksak nghal bawk a ni.