1231/2024-2025

19th July, 2024 : Vawiin khan Mizoram Pollution Control Board leh State Medicinal Plants Board, Mizoram, Directorate of AYUSH ṭangkawp chuan Govt. J. Thankima College Northern Campus Durtlang hmunah ‘Eco-Herbal Garden’ an din a. He hunah hian Govt. J. Thankima College Eco-Club zirlaite chu ramhmul damdawi ṭhatna leh chin uar a pawimawhna zirtir an ni.

Zirtirna petu Resource Person Dr. Lalrammuana Sailo, Consultant (Medicinal Plants), State Medicinal Plants Board, Mizoram, Directorate of AYUSH chuan ramhmul damdawi atana hman chi thlai leh thing hrang hrangte natna enkawl nâna an ṭhatna leh hlutnate a hrilhfiah hnû-ah Eco-Herbal Garden hi siam zui a ni. Ramhmul damdawi chi hrang hrang heng - Neem, Tejpatta, Sunhlu, Aloe vera, Kumtluang, Rûnhmui, Archangkâwm leh a dangte phun a ni a, he Eco-Herbal Garden hi Govt. J. Thankima College Eco-club-te’n an lo enkawl chhunzawm dawn a ni.

Vawiin huan siamna hi Ministry of Environment, Forests & Climate Change (MoEF&CC) bultum niin Environment Education Programme (EEP) hnuaiah kalpui a ni.  Mizoram Pollution Control Board chuan EEP hnuaiah hian Mizoram chhunga School leh College hrang hrangah Eco-club 1570 chuang a enkawl mek a ni. Environment Education Programme (EEP)-in a tum ber chu Eco-club school leh college zirlai naupangte hnena class room-a an zirlai piah lama environment humhim kawnga an ṭhanharh theih nana zirtirna kawng hrang hranga pêk a ni.