1128/2024-2025

Aizawl, the 10th July, 2024: Mizo Hmeichhe Insuihkhawm Pawl (MHIP) Republic Veng Branch Golden Jubilee lawmna hun an veng Community Hall No. 2 a neih chu vawiin chawhma dar 10:30 khan Art & Culture Minister Pu C. Lalsawivunga, Aizawl South-I bialtu MLA ni bawk chuan khuallian ni a hmanpuiin jubilee lungphun a hawng a. He huna khualzahawm MHIP Gen. Hqrs. President Pi Ngurmawii Sailo chuan jubilee souvenir a tlangzarh a ni.

Khuallian Art & Culture Minister Pu C. Lalsawivunga chuan MHIP Republic Veng Branch-in kum 50-na hmel a hmu leh ni chhinchhiah tlak tak puala hun hlimawm tak hman a ni chu lawmawm a tih thu sawiin, tun dinhmun thleng thei tura hun leh tha sengtute fakawm a ti a. Kalkhawmte chu MHIP in kum 50-na a tlin pual chibai bukin, MHIP chu zonun zemawi leh hmeichhiate dinhmun chawisanga humhalh tlat thintu pawl zahawm tak a ni, a ti a. An din chhan leh an thiltumte pawl hruaitu leh member-te'n nghet taka an chhawmnung zel thin chu fakawm a tih thu sawiin, hmasawnna tur dangte ngaihtuah chunga hmalam pan zel turin a fuih a. Mite tanpui tih thupuia hmangtu MHIP te thupui thlan chu ropui a tih thu sawiin, mite tanpui thei turin eng rilru nge kan put tih leh eng ruahmanna nge kan neih tih thlenga kan inngaihtuah a ngai a, tih theih a tam emaw, a tlem emaw, midang tana inpekna thinlung put hi a pawimawh lai ber chu a ni, a ti a. Kalkhawmte chu thinlung inhawng leh inpe tak chunga mahni inphata midangte tana malsawmna nih tum theuh turin a fuih bawk.

Aizawl South-I bialtu MLA ni bawk Pu C. Lalsawivunga chuan ram leh hnam hmasawn nana hmeichhiate pawimawhna hrang hrang tarlangin, kalkhawmte chu ram leh hnam hmasawn nana an thiamna leh finnate tun aia nasa zawka hmang turin a fuih a. Chhungkua leh khawtlang nun siam that kawnga hmeichhiate pawimawhzia hre thar leh tur leh inchhung khura an pawimawhnate theihnghilh hauh lo tura chahin, hei hi ram hmasawn nana pawimawh hmasa a ni, a ti a. Suahsualna hrang hrang avanga ram leh hnamin harsatna a tawh mek dante tarlangin, MHIP member kalkhawmte chu mahni chhungkua theuhah nundan mawi, dikna, taimakna leh rinawmna inzirtira bultan thar leh tum turin a chah a, ram leh hnam hmasawn nana ngaihtuahna seng zel turin a fuih nghal bawk.

Khualzahawm MHIP Gen. Hqrs. President Pi Ngurmawii Sailo chuan chhungkua leh ram tha siam turin a bulthum atanga tanlak a pawimawh tih sawiin, MHIP chu inthliarna awm lova mizo hmeichhia zawng zawngte lenna leh lungrual taka hmalak tlan theihna pawl tangkai tak a ni, a ti a. MHIP Golden Jubilee chuan rah tha leh hmasawnna thlen ngei se a duh thu sawiin, kum 50-na hmel kan hmu hian thil sutkian ngai leh hmachhawpte hlenchhuah kawngah phurna min pe se a duhawm hle ang, a ti a. Member-te chu hmabak la awmte puitlin thei tura theihtawp chhuaha ke pen zel turin a fuih nghal bawk.

He hun hi Pi F. Lalnunsiami, Branch MHIP President chuan kaihruaiin Pi C. Liankhumi'n hunserh a hmang a. Pi Lalromawii, Finance Secretary kaihhruaiin thuthlung sawi rual a ni a. Secretary NI. Zodinsangi'n kalkhawmte inhmelhriattirna neiin secretary report a pe a. Book of the Year 2023 lawmman dawngtu Ahmangaihi Khiangte leh Miss Mizoram 2024 Jennifer Lalrinzuali Renthlei te bakah hruaitu hlui leh tanglaite chawimawina hun an buatsaih a. Programme benglut tak takte neiin hun hlimawm tak an hmang a ni.

MHIP Republic Veng Branch hi July ni 10, 1974 ah khan din niin tun dinhmunah member 1517 an awm mek a. Zirna, hriselna, ruihhlo do leh mite tanpui kawngah an pen chhuak fo tawh thin a, an hnen atang hian MHIP branch 3, ITI, Upper Republic leh Republic Vengthlang te an indang tawh a ni.