1127/2024-2025

10.07.2024: Nimin July Ni 9, 2024 (Thawhlehni) khan India Hmarchhak bial-a Power Minister-te intawhkhawmna North Eastern Region Power Minister Conference chu Union Power Minister Pu Manohar Lal Khattar ho in Guwahati-ah neih a ni a. He hunah hian P&E Minister Pu F. Rodingliana pawh telin, Mizoram in kawlphetha a intodelh tura a hmalakna kawnga mamawhte leh harsatna te a thlen.

Minister Pu F. Rodingliana chuan Mizoram Sorkarin kawlphetha a intodelh chu a ngaihpawimawh ber ‘Top Priority’ zingah a dah thu Union Power Minister chu hrilh in,  Central Sorkar in Small Hydro Power Project 24 MegaWatt hnuailam siam nan a financial assistance a pek thin, kum 2017 hnu lama tihtawp tak chu thar thawh leh turin Union Power Minister chu a ngen a ni. Hemi chungchang hi North East Region Power Committee Meeting Agenda-ah pawh a lo chhawp chhuah tawh thu leh, North East Power Minister ten he policy ti nung leh tura Central Cabinet pawmpuina hmuh thuai anih theih nan hmalak tlan an lo rel tawh thu a sawi bawk a.  Mizoram chu kawlphetha Megawatt 3000 aia tam thar chhuak thei a nih laiin tun dinhmunah MegaWatt 40 pawh tlinglo a siamchhuak a, chutihlaiin state mamawh san lai berah MW 160 a mamawh thin thu te, thal laia MW 130 chuang Phai lam atanga lakluh reng a ngaih avangin Central in kawng hrang hrang a puih a mamawh thu a sawi a. Central Sorkar tanpuina tello chuan Mizoram mai bakah hmarchhak State dangte tan pawh hydel project thar sual chhuah a harsat avangin Small Hydro Power Incentive Scheme thar duan fel tawh, Central Cabinet approval lak hmabak chu an thutkhawm leh hmasak bera pawm anih theih nan hmalakpui turin Union Power Minister chu a ngen a ni.

Mizoram P&E Minister chuan Mizoram chu India hmarchhak kil tawp, tlang ram chhengchhe taka awm anih avangin bungrua phurh man a to zual bik em em a; hei hian State dang thenkhat te aiin scheme leh project hnathawhna man a ti sang bik lo thei lova, he harsatna hi hriatthiampui a, ngaihhnathiamna nei turin amah leh official dangte a ngen bawk a. Hmarchhak State thenkhat ten power generation chungchangah thui tak an lo kal tawh laiin Mizoram chu bul tan thar tur chauh a nih thu sawiin, State thenkhat in Sub-Station thar 40 chuang siamna tur an dawn laia 2 chauh mai pek kan ni bik chu a hriatthiamloh thu sawiin, Mizoram chhunga power generation, transmission leh distribution infrastructure thawm thatna tur mamawh tam zawk Central Ministry ah a thlen tur thu leh lo tihhlawhtlin sak turin Union Minister bakah Ministry of Power atanga official lo kalte chu a ngen a ni. Pu F Rodingliana hian Union Power Minister chu hun remchangah Mizoram lo zin a, kan dinhmunte a taka rawn hmuhpui turin a sawm a, Union Power Minister hian remchang hmasa berah lo zin a tum tur thu a sawi a ni.

He Conference hmanpuitu Pu Manohar Lal Khattar, Union Power Minister chuan India in Kum 2030 hma in renewable energy 500 Giga Watt tharchhuah hman a tum avangin North east state te hydro power tam tak tharchhuak thei an nihna chu hman tangkai a tul thu a sawi a. Central Scheme kalpui mek NERPSIP leh RDSS hnathawh mek te a hun taka zo turin a chah a, AT&C loss tam lutuk tihtlem nan Smart Metering Project kalpui thuai turin a chah bawk.

He North Eastern Power Minister Conference ah hian Mizoram, Assam, Nagaland, Tripura, Manipur, Sikkim leh Meghalaya Power Minister leh Secretary theuhte, Ministry of Power Official-te leh PSU aiawhte an tel a ni.

Minister Pu F Rodingliana hi Pu H Lalengmawia, Commissioner & Secretary leh Pu JH Malsawma, Chief Engineer ten an tawiawm a ni.