Vawiin chawhma dar 10.30 khan Art & Culture Minister Pu P.C. Zoram Sangliana pisa-ah Peace Memorial Park din tur chungchangah meeting neih a ni a; he meeting-ah hian sawrkar official-te bakah mithiam sawm bik Pu C. Chawngkunga te, Pu Lalthangfala Sailo te, Pu B. Lalthangliana te, Rev. V.L. Zawnga leh midangte an tel a ni.
Pu P.C. Zoram Sangliana chuan, “Peace Memorial Park hmang hian Mizote hi Chanchintha-in min rawn luhchilh hma daih atanga hnam ropui tak kan nihzia te, Kumpinu sawrkar pawh kum 50 chuang do ngam kan ni tihte hi khawvel hriata a taka pholan kan duh ber a. Tin, thangtharte rilruah ram leh hnam hmangaihna te, mahni hnam nun ngaihsannate a thara tuh kan tum a; kan hnam pasalthate leh lalte leh Chanchintha rawn thlentute sulhnu leh hming a daih tawh lohna tura hriatrengna buatsaih kan tum bawk a ni” a ti.
He meeting-ah hian Peace Memorial Park hi Changsil Kai-a din tura ruahman a ni a; ruahman lawk dan chuan hetah hian –Changsil kulh te, Freedom Park te, museum te, intihhlimna te leh thil dang tam tak changtlung taka din tum a ni a. Tuna Mizoram tih hming kan put hmaa kan ram leh hnam humhim tura nasa taka beitu lalte leh pasalthate lim pawh din a ni ang. Peace Memorial Park project hnuaiah hian Darkhuang Tlang, Pukpui hmun chu changtlung taka cheibawl tum a ni bawk.
Peace Memorial Park dinna tur hian Central sawrkar chuan cheng vaibelchhe 6.5 a ruahman fel thlap tawh a; hemi atana Detail Project Report pawh a rang thei ang bera thehlut tura buaipui mek a ni. Vawiina meeting hian Mizo history-a lal leh pasaltha chawimawitlak, Peace Memorial Park-a an lim din turte hming lo thliarfel turin Study Group a din a; member-te chu heng mite hi an ni:
Chairman:Pu C. Chawngkunga, Ex- Minister
Co-Chairman :Pu P.L. Thanga, IAS (retd.)
Member Secretary :Pu Zaliana Art & Culture Dept.
Member-te : Pu Lalthangfala Sailo, Pu B. Lalthangliana,
Special Invitees:Rev. V.L. Zawnga, Rev. Challianngura leh Dr. S. Hrachu te an ni.
He Study Group hian February thla thlengin an hna hi an thawk dawn a; hemi hun chhung hian mipuite hnen atangin ngaihdan leh rawtnate thehluh theih a ni ang.
