Vawiin khan Transport Minister Pu PC Zoram Sangliana hovin a pisaah kumina Road Safety Week hman dan tur relin Road Safety Council member te an thukhawm.
Meeting chuan kumin Road Safety Week thupui atan ‘Nun him nan, rui chungin lirthei khalh suh’ tih chu a thlang a. February ni 4 leh ni 8 inkara hman tur niin Mizoramin he hapta hi tum 24 a hmanna tur a ni. Minister chuan lirtheia chetsualna pumpelh nan fimkhur taka lirthei khalh a pawimawh zia sawiin kumina Road Safety Week hapta hman turah hian a darh zau thei ang bera mipuite inhrilhriat leh zirtirna pek a tul thu a tarlang a ni.
Vawiin meeting-a thurel pawimawh zingah mimal leh sorkar driver tha ber thlanchhuah ni se tih te; Traffic police Point Duty, Beat Office, Sector Officer leh Zonal Officer tha ber thlan te; lirthei khalhtute mawhphurhna, tih tur leh tih loh tur te, dan bawhchhiata hrem theihna dan te, traffic sign leh symbols bakah lirthei khalhtu te tana hriat tur pawimawh tarlanna tur lehkhabute, thuziak, flag, banner leh poster tar te; media hrang hrang kal tlanga Road Safety Week lam hawi thu puanchhuah te; hmun pawimawh thenkhata mobile court hawn te; hapta hawnna leh kharna inkhawm hman dan tur te a tel.
He meeting-ah hian Transport Secretary Pu R Lalvena, DIG Northern Range Pu C Zorammuana, Aizawl Municipal Council CEO Pu Nghaklianmawia leh sorkar mi pawimawh dangte bakah MJA, MGDA, ZDU aiawh te an tel a ni.
