Vawiin chawhnu dar 2.30 khan Art & Culture Minister Pu P.C. Zoramsangliana hovin ama pisaah Changsil kaia Peace Memorial Park of Freedom Movement din chungchang leh project dangte tihhlawhtlin dan tur chungchangah meeting pawimawh tak neih a ni.

Pu P.C. Zoramsangliana chuan, “Changsil hmuna ram leh hnam leh kan sakhaw tana thil chhenfakawm leh chhuanawm tak din hi Mizoram sawrkarin kan ngaih pawimawh ang chiahin sum senso tur min petu tur DoNER Ministry pawhin min hlutsak a.  Kum 2009-10 daih tawh khan cheng vaibelchhe 6.50 min ruahmansak tawh a ni. Hemi tipuitling tur hian sawrkarin ram a nei lova, compensation pek emaw, leisak emaw hmanga mimal ram lak a remchan loh avangin kan khawtlai phah ta deuh a. Chuvang chuan, he project hi a rang thei ang bera kut kan thlak a ngai tawh a ni” a ti.

Art & Culture Minister chuan Peace Memorial Park of Freedom Movement chu kan pi leh puten mahni ram humhalhna atana huaisen taka min runtu Sap-te an lo do letna hriatrengna atan te, thangtharte thinlunga mahni ram hmangaihna leh humhalh duhna rilru tuhna atan te, missionary-ten Chanchin Tha hmanga kan hnam min rawn chhanchhuahna hriatrengna atan te leh khualzin mite hipna atana buatsaih tum a nih thu a sawifiah a. Hetiang lam hawi project dangte pawh Pukpui, Lunglei leh Darkhuang hmunahte buatsaih tum a nih thu Pu P.C. Zoramsangliana chuan a sawi bawk.

Peace Memorial Park buatsaihna tur ram hi Mission Foundation Movement (MFM) kuta pek a nih chuan Changsil chhehvela ram neitu mimalte leh khawtlangte chuan a thlawna an ramte chu MFM kuta hlan an inhuam thu he meeting-ah hian sawichhuah a ni a. Sawrkar dan huangchhunga he project hi MFM te nena tangruala tihpuitlin dan tur pawh meeting hian a rel nghal a ni.

He meeting pawimawh takah hian Planning Department te, Finance Deptt. Te, Art & Culture department-te  leh Mission Foundation Movement hotute an tel a ni.