Vawiin khan Kolasib D.C. Conference Hall-ah International Day for Disaster Reduction 2012 hman a ni a. Day hawngtu Pi Niharika Rai, DC chuan mihringin chhiatna kan tawh thin tamtak hi chu keimahni siamchawp leh kan fimkhur loh vangte a ni a, vawiin ni atang chuan fimkhur lehzualin kan pumpelh theih tamtak a awm a ni tih i hria ang u, a ti.

Pi Rai chuan, Leimin, In kang leh Motor accident te hi Mizoramin chhiatna kan tawh langsar zualte an ni a. Electric wiring dik lo avanga in kang thin te hi a pawi em em a, lungrem chim thin te, In kan sak rih lutuk avanga lei in a dawl lohte pawh awm bawk a. Lirthei khalhtute pawhin ruih theih thil nena khalh a him lohzia kan hriat thara, Driving rules te pawh kan hriat a tul hle a ni, a ti a ni.

Disaster Management Day hmanna inkhawm hi Pi Lallianpuii, DIPRO in a kaihruai a. Kumin Disaster Reduction Day thupui chu ‘Women & Girls - (in) visible force for resilience’ tih a nih thu sawiin hmeichhiate hi inchhung khura che bertu leh khawsak dan a taka enkawltute an nih avangin mihringin chhiatna kan tawh theih thil hrang hrangah fimkhur tura midang zirtir theitu leh anmahni ngei pawh chuta tana pawimawh takte an ni, a ti a. MHIP ten Branch hrang hrangah hei hi sawi zau se a duh thu a sawi a ni.

Joint VC, YMA branch hrang hrang aiawh te, MJA leh Media te, Sub Hqrs MHIP, Police leh Medical aiawh ten sawihona hrang hrang neiin rawtna te ansiambawk a. An thu rawt zingah Kolasib District chhunga chhiatna a lo thlen thulha rang taka tanpuina hna thawh theih nana Disaster Team din tha an tih thu leh hmanraw awm ang angte hman nghal theih tura enkawl that te, Village Level Committee a thara din leh te a tel a. District Disaster Management Committee lam atanga thu a awm veleh a tul anga thawk turin NGO lam chu an inhuam reng tih an sawi a. Training fumfe tak neih nise tiin an rawt bawk a ni.

Disaster chungchang zawhna te Pu M.Misael, SDC chuan a chhang hlawm a ni.