1118/2022-2023
Aizawl, the 1st July 2022 : Art & Culture Minister Pu R Lalzirliana’n vawiin khan Synod Conference Centre ah Saihnuna Memorial Society (SAMSO) buatsaih Saihnuna Fanai, Leng Lal chanchin leh hla te ziaktu hrang hrangin an ziahkhawm, lehkhabu ‘Leng Lal Saihnuna Fanai’ tih chu a tlangzarh.

Pu R Lalzirliana chuan Thu leh Hla (Literature) tha in khawvel a nghawng a, Zofate zingah pawh a hlutna kan hre chho mek zel tiin hla tha leh mawi ten thil an ti thei lehzual emaw ti turin mihring nunah hmun thuk tak a chan thu a sawi. Lengzem hla a ni emaw, Hla Lenglawng a ni emaw, Pathian hla ril tak emaw pawh nise kan nihna leh kan hun tawn te, kan rilru min kap tu leh kan awm dan chiang taka min phochhuah saka min tarlan chian sak thei tu ber kan tana hla tha leh hlu, kan nun zawng zawng tikehsawmtu leh min chhawk zangkhai thintu a nih avangin a hlu hle a. Chutiang ang tak hla ril leh hlu, mawi tak mai Zofate tana min phuah saktu Pu Saihnuna Fanai kan nei hi a hlu takzet a ni, a ti.

Art & Culture Minister chuan Pu Saihnuna chu lal fing tak leh rorel thiam tak ni chungin a khua leh tuiten an hriat dan ber chu hlaphuah thiam, ngilnei leh zaidam a nihna chu a hlu hle nia a hriat thu a sawi a. Hla chi hrang hrang, Kraws lam hla, rawngbawlna leh thlamuanna hla bakah lusun khawhar hla tha tak tak leh khawtlang lunglen leh lenglawng hla mawi tak tak Zofate min hnutchhiah saktu chanchin leh a hlate a bu a siam a ni chu lawmawm a tih thu a sawi bawk.

Lehkhabu tlangzarh programme hi Pu RD Lalrammawia, Chairman, SAMSO in kaihruaiin Rev. Remlalfaka, Auxiliary Secretary, Bible Society of India in hunserh a hmang a. Prof. Rualkhuma Colney Sr. Adviser in lehkhabu thlirlawkna hun a hmang a ni.

Saihnuna Fanai hi kum 1896 ah piangin, a pa a boral hnu, 1927 ah Leng Lal a ni a, kum 1949 ah a boral a. Kum 1921 ah Kristian ah in pe in 1924 ah Baptisma a chang a. Mizo Lal zinga chuan hlaphuah thiam leh phuah tam tia hriat lar a ni.