1119/2022-2023
Kolasib dated 1st July 2022: Vawiin khan DC Conference Hall, Kolasibah District TB Forum chuan thutkhawmna neiin rampum a TB natna um bo a nih theih nana beihpui ‘TB MUKT Bharat 2025’ tih puitlinna tur a hmalak dan tur sawi hona an nei a. TB natna um bo a nih theih nana endik, enkawl leh a hrik awm leh awm loh finfiah hna chak zawk a kalpui dan tur te sawi a ni.

Hun kaihruaitu Pu John LT Sanga, Deputy Commissioner chuan ‘National Doctors’ Day’ a nih angin Kolasib mipuite hriselna enkawl a, hrileng lak a mipui himna tur a rim tak a thawk thin Doctor-te chungah lawmthu sawiin Kolasib mipui tan a malsawnna ni zel turin a chah. TB natna chu natna langchhuak mai lo, hmuhchhuah har tak leh enkawl hautak tak a nih avangin a veite dap chhuah hna ngawrh tak a kalpui a pawimawh thu a sawi a. TB natna endik kawnga hmanraw pawimawh tak, Central TB Division atanga dawn, Digital X-Ray Machine pawh hman theih tur a bun fel vat a nih theih nan a tul ang angte bawhzui a nih tur thu a sawi.
Deputy Commissioner chuan TB natna veite an dam leh thuai theih nana eitur an mamawh bithliah ang an hmuh theih nan ‘TB Patients Support Scheme’ hnuai ah khawtlang, pawl leh mimal atangin tanpuina a pek theih reng thu a sawi a. Mi 11 lai vawiin a donor ni tur a inziaklut an awm chu lawmawm a tih thu sawiin midangte tan a malsawnna ni turin a duh apiang tan donor a nih theih thu a sawi bawk a ni.

Dr.RK Lalthlamuana, SMO tarlan danin kum 2021 khan Kolasib district atanga sample endik zawng zawng atangin mi 68-in TB an vei tih hmuhchhuah a ni a, chung zinga 3 chu Multi-Drug Resistant TB vei an ni. Kum 2022 June thla thleng khan TB vei hmuhchhuah mi 100 awmin heng zinga 5 chu Multi-Drug Resistant TB vei an nih thu a tarlang. Piramal Swasthya nen a thawhhona hnuai ah Kolasib district chhunga khaw 41-ah TB vei dapchhuah hna kalpui a nih chhungin mi 67,762 endik an ni a. TB vei rinhlehawm mi 1,104 atangin sample lak niin chung zinga sample 16-te chu TB vei an nih thu a sawi a. Hemi bak ah hian Community Health Centre leh Primary Health Centre kaltlangin kumin a sample 29,666 endik atangin TB vei 4 hmuhchhuah a ni bawk.

Thutkhawmnaah hian TB vei enkawl lai ten damdawi a hun tak a ei an ngaih pawimawh a tul zia sawi a ni a. TB vei ten enkawlna an lak chhungin thla tin cheng 500 an dawn theih thu te, an dam hnuah Tribal Incentive cheng 750 an dawn theih thu te, inenkawlna kalpui chhungin, Treatment support, cheng 1,000 atanga cheng 5,000 thleng an dawn theih thu tarlan a ni a. TB veite tanpui tur a Donors tur a mi tam zawk an inziahluh theih nan mipui hnenah Chanchinbu leh Cable network kaltlangtea ngenna siam ni se tih rel a ni.

Attachment

  • Loading attachment...