1120/2022-2023
Aizawl, 1st July, 2022 : Vawiin khan SAD Conference Hall, MINECO ah Mizoram a COVID-19 hripui dinhmun thlirho a ni a. He hun hi Health & Family Welfare Minister Dr. R. Lalthangliana'n kaihruaiin, Chief Secretary aiawh Pi Manisha Saxena, IAS, H&FW Principal Secretary Pi Esther Lalruatkimi, Health Department hotute leh Indian Medical Association aiawhte an tel a ni.

Vawiin thukhawm hian tunhnaia Mizorama COVID-19 hri kai an pung chak thar leh chu ngaihthah chi a nih loh thu an sawi a, hun kal tawha COVID-19 hri hluar dan an zirchiannaah India ram hmunpui (Maharashtra, Delhi etc.,) lama hri kai an pun nasat (peak) atanga chhuta thla khat leh thla hnih inkarah Mizoramah an dinhmun ang kan thleng ve ziah thin a, tunah hian india ram hmunpui lamah a hluar nasat leh tan mek avangin leh kan hun tawng tawh atanga chhutin tun hun hi kan lo inven lawkna hun remchang ber a ni, an ti a. Mipuite chu theihtawp chhuaha fimkhur thar leh tura ngenin, hun reilote chhung kan fimkhur theih chuan kan fihlim thuai thei zawk dawn a ni, an ti.

COVID-19 hri laka invenna pawimawh ber pakhat COVID Appropriate Behaviour (CAB) uluk taka zawm thar leh a pawimawh thu tarlan niin, a bik takin chhiatni thatni leh mipui punkhawmna hmun Pathian biak inkhawmna, zirna in leh vantlang huap mipui intawhkhawmna hmunahte CAB, a bik takin mask vuah leh midang hlata awm (social distancing) zawm that a tul thar leh hle a ni tih sawiin, CAB zawm a pawimawhzia inzirtir thar leh turin kohhran hrang hrangte leh tlawmngai pawlte ngen leh nise an ti bawk.

COVID-19 hri kai nia inringhlelte chu a rang thei ang bera sample test a pawimawh thu sawiin, he hri vanga nunna chante zingah in test tlai, an nat fe hnua in test chauh an awm thin tih tarlan niin, mahni inringhlel chuan natna a lan chhuah hma ngeia in test turin an ngen a, mahni a sample in test (self test) te pawh IDSP hennah emaw, anmahni bialtu health department hnenah in report thin turin an ngen a ni.

COVID-19 vaccine lak a pawimawh thu mipuiten hre thar leh se an duh thu tarlan a ni bawk a, a bik takin precautionary dose lak hun tawhte leh 2nd dose lak hun tawhten lak ngei ngei a tul thu tarlan niin, vaccine la duhten District tina Chief Medical Officer (CMO) te hnenah vaccine lakna hmun leh hun a zawhfiah theih thu tarlan a ni bawk.

Vawiin meetingah hian COVID-19 hri dona kawngah hmanraw pawimawh chi hrang hrang – test kit, PPE kit etc., ah hlauhthawn tur a awm loh thu tarlan a ni a, thawktute dinhmunte leh hmalakna tur chi hrang hrangte thlirho a ni bawk a ni.

Health Minister Dr R. Lalthangliana chuan tunhnaiah hri kai kan pung thar leh a, hun engemaw chen kan lo zalen tawh avangin lkan thla pawh a muang tawh a, nunphung pangngai kan lo zawh rei tawh lai hian kan fim khur hle a la ngai tih kan hriat tlan a pawimawh a ni, a ti a. kan dinhmun a chhiat thui viau hnu a fimkhur thar leh ai chuan tun huna kan lo inven fimkhur lawk hian awmzia nasa takin a nei dawn a ni tiin mi zawng zawng hnenah theihtawp lo chhuah thar theuh turin ngenna a siam a ni.

Integrated Disease Surveillance Programme (IDSP) report atanga a lan danin thla kalta June-ah khan COVID-19 hri kai thar mi 771 an awm a, hri kai hmuhchhuah tam ber ni chu June ni 8 kha niin hri kai thar mi 64 hmuhchhuah an ni. May thla khan sample 9343 test niin hri kai 839 (8.98%) hmuhchhuah an ni a, June thla khan sample test 7092 zingah positive 771 (10.87%) hmuhchhuah an ni. June thla kar hnuhnung ber (23 – 30) khan sample 1743 test niin positive 301 (17.27%) hmuhchhuah an ni.

Attachment

  • Loading attachment...