1121/2022-2023
Lunglei the 1st July, 2022: Sawrkar laipui Ministry of Minority Affairs hnuaia Pradhan Mantri Jan Vikas Karyakram (PMJVK) kaltlanga cheng nuai 4919.31 senga ruahman tur ‘Lunglei District Sports Complex’, Rahsiveng chu Minister Pu C. Lalrinsanga’n a lung a phum a, Sports & Youth Services Minister Pu Robert Romawia Royte chu he hunah hian khualzahawm a ni.

Lungphum phumna Function hi Rahsiveng Market Shed ah neih niin Lunglei HPC Vice Chairman Pu Lawmawma Tochhawng, Lunglei South bialtu MLA Dr K Pachhunga, Sports & Youth Services Secretary Dr Lalrozama, Lunglei DC Pu Kulothungan A leh official dangte bakah, Lunglei District MJA hruaitute, tlawmngai pawl hrang hrang aiawhte, khawtlang hruaitute leh sawm bik dang te an tel a ni.

Minister Pu C. Lalrinsanga chuan Lunglei District Sports Complex din tur chu hmasawnna ropui tak a ni tiin he sports infrastructure lian tham tak Lunglei District in a neih theihna tura theihtawp chhuahtu Sports & Youth Services Minister Pu Robert Romawia Royte leh a thawhpuite chungah lawmthu a sawi a. Sports infrastructure dang lian tham tak tak Leitlangpui Hockey Ground, Futsal Ground Ramthar Veng, Zobawk Residential Sports School, Electric Veng Astro Turf Football Ground din mekte chuan hun lo kal zel turah rah tha tak chhuahin infiamna lamah Lunglei District-ah hmasawnna tam tak a thlentu leh hlawhtling tura infiammi chherchhuahna hmanraw tangkai tak an la nih ngei a rin thu a sawi a. Khawvel changkang chho zelah infiamna chu eizawnna a tlin bakah thalaite nun a tha zawnga kaihruai thei tu leh zuk leh hmuam leh ruihhlo laka kan fihlim theihna tura hmanraw pawimawh tak ala nizel dawn a ni, a ti a. District mipuite chu neitu thinlung pu-a hna thawktute pawh tha taka lo thawhpui turin a chah bawk a ni.

He Lungphum hawnna ah hian Khualzahawm Sports Minister Pu Robert Romawi Royte pawhin thu sawiin Lunglei district thalaite mamawh em em Sports Complex sak tan a ni tur chu lawmawm a tih thu a sawi a. District Sports Complex atana sanction hmuh hi thil awlai lo tak a ni a,a kentel infrastructure hrang hrangte hi Lunglei District mipui mai bakah Zoram pum rohlu a ni ang a ti. Sports Minister chuan Covid hripui avangin hmalak tur thenkhat khawtlai deuh mahse tunah chuan Lunglei khawpui chhungah Rs 11000 lakh zet man hnathawh chhoh mek a ni a, Sports Department hnuaia Lunglei Project zawng zawng atan contractor thlan fel vek an ni tawh a, July 2022 chhungin project zawng zawng thawh tan vek a ni dawn a ni a ti.

Pu James Lalramnghaka, Assistant Engineer, Mizoram State Sports Council chuan Technical Report a pe a. District Sports Complex Lunglei siamna tur atan hian Ministry of Minority Affairs, Government of India hnuaiah Pradhan Mantri Jan Vikas Karyakram (PMJVK) atangin Rs. 4919.31 lakhs approval dawn a ni a. 90% Rs. 4427.38 lakhs chu Central tum tur niin, 10% Rs. 491.93 lakhs chu State Sawrkar tum tur a ni.

Ni 31.08.2021 khan Central atangin 1st Instalment Rs. 2213.69 lakhs dawn tawh a ni a. Tunah hian Tender tawh niin, he hna thawk tur atan hian M/S Consortium of Leitlang Consultant and Décor India, Guwahati te thlan a ni a. Hna pawh tan thuai tum a ni.

He Project hnuaiah hian heng hna hrang hrangte hi thawh tur a ni ang :
1) Laying of Football Astro Turf Ground at Rahsi Veng Playground
2) Construction of Pavilion with Changing Room
3) Construction of Galleries (2 Blocks)
4) Construction of Volleyball Court
5) Construction of Semi Indoor Basketball Court
6) Construction of Approach Road with Parking
7) Renovation of Thuamluaia Playground
8) Construction of 8-lane Running Track at State Sports Academy, Zobawk.