Art & Culture Minister Pu R Lalzirliana chuan vawiin khan Art & Culture Department hnuaia awm Tribal Research Institute buatsaih Mizoram District Gazetters Aizawl tih lehkhabu chu a office chamber ah a tlangzarh.

Art & Culture Minister Pu R. Lalzirliana chuan District Gazetter hmasa chhuah lai kum 1989 leh tunlai hun tehkhinin hun a in her danglam nasa tawh a, kawng hrang hrangah hma kan sawn a, heng hmasawnna chanchin ziahna bu kum tam tak hnua buatsaih a ni leh thei chu lawmawm tiin hetiang lehkhabu hi ro a tling a, nakin zelah Mizoram leh Mizote chanchin ziahna kawngah mithiam ten an tangkaipui theih thu a sawi.

Art & Culture Department chu Department lian vak lo ni mahsela Department pawimawh tak anih thu Pu R. Lalzirliana chuan sawiin Mizo te mahni hnam ziarang ngaihhlutna leh chawisan zelna kawngah hna pawimawh tak Department in a thawk a,  Mizo nationalism thalai te an hriat zelna atan pawh a tangkai thei hle in ka hria a ni, a ti a. Hnam zia rang ‘culture’ leh hna lam te hi tunlai mil a tih danglam chu tha a tih lo thu sawiin tunlai khawvel mil a hnam lam te kan modernise chuan a hlutna a bo thei a ni, a ti.

Lehkhabu tlangzarh programme hi Pu R. Hmingthanzuala, Director, Art & Culture Department in kaihruaiin he lehkhabu buatsaihtu Pi K. Laldinpuii, Senior Research Officer, Tribal Research Institute in lehkhabu chanchin tawi a sawi a, Pi Carol VLMS Dawngkimi’n lawmthu sawiin programme a khar a ni.

District Gazetter hi British hunlai khan British hovin District chanchin hrang hrang ziaka an dahkhawmna bu a ni thin a. Kum 1989 khan Art & Culture Department in Mizoram District Gazetter hi a lo buatsaih tawh a, vawiina lehkhabu tlangzarh tak hi kum 1989 hnua Gazetter bu an buatsaih leh chu a ni.

Mizoram District Gazetters Aizawl District hi cheng 400 man niin phek 575 a ni a, Tribal Research Institute ah lei theih in a awm a, copy 500 chiah chhut a ni. He lehkhabuah hian Mizoram chanchin hrang hrang tarlan niin reference atana lehkhabu pawimawh tak a ni.