Vawiin khan Champhai Police buatsaihin Champhai Police Station Conference Hall-ah Pu Rengkhuma, Vaphai khua chawimawina leh Ni thum awh tur Champhai District Executive Force chhunga Police Officer-te puala   inzirtirna ‘Workshop on Prosecution’ tih thupui hawnna hun neih a ni a.  He hun hi  Pu R. Vanlalena, Additional District & Session Judge Champhai chuan hmanpuiin  Pu Rengkhuma hnenah DG chawimawina Citation leh Pawisafai Rs 5000/- hlanin, Police Officer-te tana Workshop buatsaih a hawng a ni.

Thusawiin Pu R.Vanlalena chuan Police hna chu mi huaisente  hna, inthununna tha tak hnuaia rilru leh taksa hrisel neih ngai a ni, a ti a. ND&PS Act tlawhchhana man hrem loha putchhuak  thin chu  ngaihmawhawm a tih thu leh dan ang taka an phu tawk hremna pek an nih theihna tur chuan a buaipuitu ten felfai taka hma an lak thin a ngai a ni, a ti a. Thuhretu a tan hrehlo tur leh a mantute lamin dan ang thlapa  an ziahfel phawt chuan  hremna chu tuma tan  pumpelh theih ani lo, a ti a.  Police mi leh sate an hnathawh   chu  ram leh hnam chhanna ani tih hre tlata   thahnemngai taka an kuta tla mawhphurhnate hlen thin  turin a chah a. Pu R.Vanlalena chuan   dan leh thupek kengkawhtute chu ram leh hnam tana theihtawp chhuaha tanho puiah sawmin, kan vaia tanho hian Mizoram tan hna tha tak kan thawk thei a ni, a ti bawk.

He hun hi Pu Rex Zarzoliana Vanchhawng, SP Champhai chuan  kaihruaiin Police Officer-te puala trainning leh ram leh hnam tana thahnemngai taka Police-te thawhpuitu Pu Rengkhuma chawimawi a ni chu phurawm a tih thu leh midangte tana entawntlak anih thu a sawi a. Hmeichhe naupang khawngaihthlak leh baihvai tak takte   chhanchhuah kawnga Pu Rengkhuma’n Police mite bengvara a tawiawmnaah lawmthu a sawi a,  he thil thleng   hian midangte pawhin ram  leh hnam   tan rawng kan bawl thei ani tih entir se a duh thu a sawi a. Champhai SP chuan Police Officer training turte hnenah Investigating Officer tha tak misual hnuchhui leh manchhuah kawnga hlawhtling ni tur chuan a kalhmang Prosecution Process  hriatchian hmasaka uluk taka kalpui  a ngaih thu a sawi bawk.

He hunah hian vawiin ni a DG chawimawina hlan tak Pu Rengkhuma, Vaphai hnen atangin  thusawi ngaihthlak a ni a.    Pu Rengkhuma hian kumin June Ni 17, Thawhtanni zing dar 8 khan Aizawl atanga Vaphai a panna lamah Leithum Sumo pakhatin hmeichhe naupang rual rinhlelhawm tak a phur ani tih a hriatin, hruaibo leh hralhruk tum (Trafficking) an nih a ringhlel a, a tul anga hmala turin Dungtlang Police Station a duty-te a hrilhhre vat a ni. Hemi ni vek hian heng hmeichhia hralhruk tum mi 8 te hi chhanchhuah nghal an ni. Pu Rengkhuma  thil tih ropui tak hi DGP Mizoram hnenah report a ni a, a thil tih avang hian vawiin ni hian chawimawi niin, Citation leh Rs. 5000/- (Sangnga)  hlan a lo ni ta  a ni.

Vawiin Pu Rengkhuma chawimawina leh Police Training hawnna hun hi Pu Francis Lalnuntluanga Ralte, MPS, Addl. SP Champhai chuan lawmthu sawiin a khar a. Training  neih hun chhung hian thil sual titu ten dan ang thlapa an phu tawk hremna an hmuh ngei theihna tura hriat tur pawimawh leh tangkai thei angte zirho thin a ni dawn a. Police Officer-te leh dan lam hre mite te’n thupui hrang hrang hmangin  zirtirna an pe thin dawn a ni.