3180/2022-2023

Dated Serchhip, the 5th January, 2023: Vawiin khan Pu R. Lalzirliana, Minister, Art & Culture, P&E etc., chuan Saihnuna Memorial Society (SAMSO) leh Art & Culture Department tangkawpten an siam hlaphuah thiam hmingthang leh Leng lal ni bawk Pu Saihnuna Lungdawh, Leng khuaa Lallungkawn a mi chu a hawng.

Lungdawh a hawn zawhin Pu R. Lalzirliana chuan thusawiin, Saihnuna hi ka mingaihsan tak mai a nih avangin kum 2016 a a lung phunnaah pawh ka lo tel tawh a, a hnuah a chanchin ziahna lehkhabute buatsaih leh niin vawiinah a Lungdawh kan han hawng leh ta a ni a, amah ka ngaihsan avang leh kan hnam tana a hlutna hi hre ve phaka ka inngaih avangin ka rawn tel ve zel mai a ni. Khawvel lal ni chungin Pathian tih mi leh thlaraumi, ringtu entawn tlak nih a fawm a, leiah chauh lal lovin vanah pawh dinhmun ropui tak a luah dawn niin ka hria a ni. A thu leh hla min hnutchhiahte hi a ril a, rilru a hnehin lung a kuai em em mai a, vawiin thlengin a hlate hi kan la sa ning thei lo a nih hi. Chuvang chuan Pu Saihnuna hi kan ram leh hnam tan rohlu a tling a, ngaihsan leh nghaihhlut a phu hliah hliah a, a sulhnu leh a kutchhuakte vawnhim duhtu pawl tha tak in lo din pawh hi a tha tak zet a ni, a ti a. Lal tha in neih avangin vawiin thlengin in khawtlang pawh a tha zui zel nitein a lang a, khawtlang inenkawlna kawng tinrengah Leng khua in langsar hle zel mai a ni, tiin Pu Saihnuna a ngaihsan thu leh lal tha a nihna vawiin thlenga a lang zui zel nia a hriatthu a sawi a ni.

Leng lal Saihnuna Fanai hian Pathian fak hla 28, khawhar hla 32 leh hla dang 24, a vaiin hla 84 phuahtu a ni a, vawiin thlengin a hlaphuahte hian sak a hlawh em em a ni. Tin, amah hi Fanai lal ropui Rorehlova thlah kal zel niin kum 1927 atangin Lengah hian a lal tana lal ban thleng khan a lal a ni. Lal rorel thiam a nih avangin Bawrhsap hnen atangin lawmman Silai a dawng nghe nghe a ni. A thu leh hla leh a sulhnute vawnhim zel a nih theih nan mithahnemngaiten Saihnuna Memorial Society (SAMSO) dinin, anni hian Saihnuna Fanai thu leh hlate dahkhawmna lehkhabu te siamin, a thlan pawh 2016 khan Leng khaw thlanmualah an phun tha tawh a. Tunah a Lung, a lim mawi tak telin Art & Culture Department atanga sum an dawn hmangin Leng khaw laili takah an phun leh a, Saihnuna Lungdawh tiin. Hei hi vawiina hian Art & Culture Minister-in a hawn chu a ni.

A hawnna inkhawm hi Pu RD Lalrammawia, Chairman, SAMSO in a kaihruai a. Rev. K. Lalhmingmawia'n hunserh a hmang a, Pu Lalrinthanga, Secretary, SAMSO chuan report tlangpui pein Pu B. Lalfinga, Leng VCP pawhin thusawina hun a hmang bawk. He hunah hian zaithiamten Pu Saihnuna hlate sain mipui an awi a, Nula Laithangpuii'n "Ka taksa lungngai mah se la, vanramah thlain ka leng thin" tih hla te, "Rih lipui hi thlafam leng kaina" tih hla leh "Ni leh Thla leh Arsi an dang chuang law'ng e" tih hlate a sa a, Pu Vanlalhluna'n "Tlang a dang lung a leng e mai" tih hla a sa bawk.

Lungdawh hawnna inkhawm hi Pu Saihnuna Fanai tupa Pu F. Ronguauva, SAMSO sum vawngtu ni bawk chuan lawmthu sawiin a khar a, kalkhawmten tlai lamah ruai a kil ho nghal a ni.